"Bu gün Azərbaycan Avrasiyanın yeni geosiyasi və geoiqtisadi xəritəsində əsas dayaq nöqtələrindən biridir" - DEPUTAT

"Bu gün Azərbaycan-Avropa İttifaqı münasibətlərində yeni siyasi mərhələnin başlayıb. Prezident İlham Əliyevlə Avropa Komissiyasının Prezidenti Ursula Fon der Lyayenin ölkəmizə səfəri zamanı mətbuata verdikləri birgə bəyanatlar Azərbaycan-Avropa İttifaqı münasibətlərində yeni siyasi mərhələnin başlandığını bir daha sübut etdi".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, bu səfər sadəcə növbəti diplomatik görüş deyildi:

"Son aylarda Avropa İttifaqı rəhbərliyinin Bakıya səfərləri göstərir ki, Brüssel artıq Cənubi Qafqaza əvvəlki prizmadan baxmır və Azərbaycan regionda yaratdığı yeni reallıqları qəbul edir. Bu da danılmaz faktdır ki, Azərbaycan bu gün Avropanın enerji təhlükəsizliyi, nəqliyyat marşrutları və regional sabitlik siyasətinin ayrılmaz hissəsinə çevrilib. Ümumiyyətlə, ölkə başçısının da vurğuladığı ki, bu gün Avropa Komissiyası ilə Azərbaycan arasında münasibətlərin çox mühüm mərhələsindir. Əvvəlcə Avropa İttifaqı Şurasının Prezidenti Antonio Koştanın, ardınca Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallasın, daha sonra isə Ursula Fon der Lyayenin Bakıya gəlməsi Avropa İttifaqının Azərbaycanla münasibətlərə verdiyi xüsusi önəmin göstəricisidir. Bu da özlüyündə enerji məsələsinin artıq təkcə iqtisadi deyil, siyasi təhlükəsizlik məsələsinə çevrilməsini sübutudur. Bu da Prezident İlham Əliyevin bu gün hər ölkə üçün enerji təhlükəsizliyi milli təhlükəsizliyinin ən mühüm amilidir fikirini təsdiq edir.

Son dörd ildə Azərbaycanın Avropa İttifaqına qaz ixracının təxminən 65 faiz artması və Aİ-nin 10 üzv dövlətinin bizdən qaz alması təsdiqləyir ki, Azərbaycan Avropa üçün ən etibarlı tərəfdaşlardan biridir. 2022-ci ildə imzalanmış Strateji Tərəfdaşlığa dair Anlaşma Memorandumu" bu gün konkret iqtisadi nəticələr verir və Brüssel də bunu açıq şəkildə etiraf edir. Ən önəmlisi bu gün münasibətlər yalnız qaz üzərində qurulmur. Prezident İlham Əliyevin çıxışı zamanı açıqladığı rəqəmlər gələcəyin enerji xəritəsinin də Azərbaycanda formalaşdığını göstərir.

Növbəti beş-altı il ərzində səkkiz giqavat günəş və külək enerjisinin istehsalına imkan verəcək müqavilələrin imzalanması Azərbaycanın yaşıl enerji ixracatçısına çevrilmək iddiasını gücləndirir. Ursula Fon der Lyayenin də çıxışında Azərbaycanın təmiz enerji və elektrik bağlantıları üzrə böyük potensiala malik olduğunu vurğulaması bu baxışın Brüsseldə də bölüşüldüyünü göstərir".

Deputat vurğulayıb ki, Ursula Fon der Lyayenin səfəri zamanı diqqətçəkən ən mühüm siyasi mesajlardan biri də Azərbaycan-Ermənistan arasındakı sülh prosesi ilə bağlı idi:

"Prezident İlham Əliyev çıxışında bildirdi ki, Azərbaycan və Ermənistan arasında de-fakto sülh artıq qurulub. Bakı bunun praktik nəticələrini göstərmək üçün konkret addımlar atır. Ermənistana tranzit məhdudiyyətlərinin aradan qaldırılması, yanacaq ixracının başlanması regionda yeni iqtisadi münasibətlər modelinin formalaşdığını göstərir. Səfər zamanı ən diqqətçəkən məqam isə Avropa Komissiyasının da bu prosesi açıq şəkildə dəstəkləməsi oldu. Belə ki, Ursula Fon der Lyayen çıxışında regional əməkdaşlığın genişləndirilməsi üçün maliyyə və siyasi dəstək verməyə hazır olduğunu bəyan etməsi də bunu təsdiqləyir. Bütün bunlar Bakı ilə Aİ arasında münasibətlərin müsbətə doğru dəyişdiyini göstərir. Əgər bir neçə il əvvəl əsas müzakirə mövzusu enerji tədarükü idisə, indi gündəlikdə ticarət, yaşıl enerji, nəqliyyat dəhlizləri, regional təhlükəsizlik, sülh və uzunmüddətli iqtisadi inteqrasiya dayanır. Ursula Fon der Lyayenin ölkəmizə səfəri sübut etdi ki, Azərbaycan artıq Avropa üçün sadəcə enerji ixrac edən ölkə deyil. Həm də Avrasiyanın yeni geosiyasi və geoiqtisadi xəritəsində əsas dayaq nöqtələrindən biridir".

Telegramda izləyin