55 saat dayanmadan üzüb tarix yazdı - Video

Polşalı üzgüçü Bartlomey Kubkovski inanılmaz uğura imza ataraq Baltik dənizini tam şəkildə üzərək keçən ilk insan kimi tarixə düşüb.

"Qafqazinfo" xəbər verir ki, Kubkovski təxminən 160 kilometrlik məsafəni qət edərək İsveçin Koseberqa şəhərindən Polşanın Djnuv sahilinə çatıb. O, bu çətin səyahəti sudan çıxmadan və fasilə vermədən təxminən 55 saata tamamlayıb.

Üzgüçünü yol boyu qidalanma, tibbi nəzarət və istiqamət müəyyənləşdirmə üçün xüsusi müşayiət qayıqları dəstəkləyib. Lakin keçidin qaydalarına əsasən, Kubkovski qayıqlara toxuna, onların üzərinə çıxa və yata bilməzdi. Rekordun qeydə alınması üçün o, sahilə öz gücü ilə çıxmalı olub.

55 saatlıq mübarizədən sonra necə hiss etdiyi soruşulan idmançı həddindən artıq yorğun olduğunu və yaşadıqlarını hələ tam dərk etmədiyini bildirib.

Bu, Bartlomey Kubkovskinin Baltik dənizini keçmək üçün beşinci cəhdi olub. O, 2025-ci ildəki sınağında Polşa sahillərinə cəmi 11 kilometr qalmış huşunu itirib və təhlükəsizlik məqsədilə sudan çıxarılıb.

Budəfəki rekord üzgüçülük həm də xeyriyyə məqsədi daşıyıb. Kubkovskinin təşəbbüsü xərçəng müalicəsi alan uşaqlara yardım edən "Cancer Fighters" təşkilatı üçün təxminən 600 min Polşa zlotısı (140 min avro) vəsait toplanmasına kömək edib.

Kubkovskinin uğurundan sonra keçidi tamamlayan ilk qadın olmaq istəyən keçmiş polşalı olimpiyaçı Karolina Şçepanyak da eyni marşrut üzrə üzməyə başlayıb. Lakin onun cəhdi uğursuz nəticələnib. Şçepanyak dənizdə təxminən 58 saat qaldıqdan sonra finişə 40-45 kilometr qalmış sudan çıxarılıb.

Onun komandası bildirib ki, idmançının vəziyyəti stabildir, lakin uzunmüddətli üzgüçülükdən sonra yorğunluq, ağrılar və bədəndə şişkinlik yaranıb.

Şçepanyakın bu cəhdi də xeyriyyə məqsədi daşıyıb və ağır onurğa zədəsi alan 14 yaşlı uşağın müalicəsi və reabilitasiyası üçün ianə toplama kampaniyasına dəstək verib.

Telegramda izləyin