Hörmüz boğazının bağlanması dünyanı iqtisadi böhranla üz-üzə qoya bilər? - İQTİSADÇIDAN AÇIQLAMA

Dünyanın ən strateji enerji marşrutlarından biri hesab olunan Hörmüz boğazının yenidən bağlanması ilə bağlı narahatlıqlar yenidən gündəmə gəlib. Böyük Britaniyanın "The Guardian" nəşri yazır ki, boğazın uzun müddət fəaliyyətini dayandırması ölkə iqtisadiyyatını tənəzzül riski ilə üz-üzə qoya bilər.

Ekspertlər isə xəbərdarlıq edirlər ki, belə bir ssenari təkcə Böyük Britaniya ilə məhdudlaşmayacaq, neft və mayeləşdirilmiş təbii qaz tədarükündə yaranacaq ciddi fasilələr enerji qiymətlərinin kəskin bahalaşmasına, inflyasiyanın sürətlənməsinə və dünya iqtisadiyyatında yeni böhran dalğasına səbəb ola bilər. Bəs Hörmüz boğazının uzun müddət bağlı qalması həqiqətən də qlobal iqtisadi böhran yarada bilərmi?

Mövzu ilə bağlı Liberal İqtisadçılar Mərkəzinin sədti Akif Nəsirli Sonxeber.az-a açıqlamasında bildirdi ki, hörmüz boğazı dünya enerji bazarının ən strateji keçid məntəqələrindən biridir. Onun sözlərinə görə, qlobal neft ticarətinin və mayeləşdirilmiş təbii qaz ixracının əhəmiyyətli hissəsi məhz bu marşrutdan həyata keçirilir: "Əgər boğaz uzun müddət bağlı qalarsa, dünya bazarına enerji tədarükündə ciddi problemlər yarana, neft və qazın qiyməti kəskin bahalaşa bilər. Belə bir vəziyyət qlobal inflyasiyanı sürətləndirər, istehsal və nəqliyyat xərclərini artırar, beynəlxalq ticarətə mənfi təsir göstərər. Enerji idxalından asılı olan ölkələr daha çox zərər görər, sənaye istehsalı zəifləyə və iqtisadi artım tempində azalma müşahidə oluna bilər. Böyük Britaniya da daxil olmaqla Avropa ölkələri və Asiyanın iri iqtisadiyyatları bu təsirləri daha çox hiss edə bilər.

Bununla belə, qlobal böhranın dərinliyi boğazın nə qədər müddət bağlı qalacağından, alternativ marşrutların və strateji neft ehtiyatlarının hansı həcmdə istifadə olunacağından, eləcə də əsas neft istehsalçılarının bazara əlavə tədarük imkanlarından asılı olacaq. Qısamüddətli fasilələr bazarda qiymət artımı və qeyri-müəyyənlik yaratsa da, uzunmüddətli bağlanma dünya iqtisadiyyatında resessiya (iqtisadi aktivliyin azalması) riskini əhəmiyyətli dərəcədə artıra və qlobal maliyyə bazarlarında ciddi sarsıntılara səbəb ola bilər".

Telegramda izləyin