Bu vəziyyət valideynlərin arxayınlaşması üçün əsas yaratmır - Sosioloqdan ÇAĞIRIŞ

Azərbaycanda yaş məhdudiyyəti tətbiq edilən sosial şəbəkə platformalarının fəaliyyəti ilə bağlı tələblərin pozulmasına görə cərimələrin müəyyənləşdirilməsi rəqəmsal təhlükəsizlik mövzusunu yenidən gündəmə gətirib. Xüsusilə uşaqların və yeniyetmələrin internet mühitində qorunması məqsədi daşıyan bu dəyişikliklərin nə dərəcədə effektiv olacağı geniş müzakirə olunur. Bəs, yaş məhdudiyyəti ilə bağlı tələblərin sərtləşdirilməsi azyaşlıların rəqəmsal davranışına necə təsir göstərə bilər və bu cür hüquqi mexanizmlər valideyn nəzarətini nə dərəcədə əvəz edə bilərmi?
Məsələ ilə bağlı Sonxeber.az-a açıqlama verən sosioloq Hüseyn İbrahimov bildirib ki, sosial şəbəkələrdə yaş məhdudiyyəti tələblərinin sərtləşdirilməsi məsələsi təkcə uşaq və yeniyetmələrə deyil, həm də onların valideynlərinə müəyyən məsuliyyət yükləyir.

"Bu, ilk növbədə valideyn nəzarəti ilə birlikdə həyata keçirilməli olan bir məsələdir. Çünki azyaşlı uşaqlar sosial şəbəkələrdə elə davranışlar sərgiləyə bilərlər ki, yaşlarına görə onlara hüquqi sanksiyaların tətbiqi mümkün olmasa da, belə hallarda valideynlər birbaşa məsuliyyət daşımalıdırlar. Bu məsuliyyət yalnız hüquqi normaların icrası ilə məhdudlaşmır. Eyni zamanda, cəmiyyətin sağlam inkişafı, gələcək nəslin düzgün formalaşması, ailə institutunun səmərəli fəaliyyət göstərməsi və gələcəkdə ailə quracaq şəxslərin şəxsiyyət kimi yetişməsi baxımından da mühüm əhəmiyyət daşıyır".

Sosioloq bildirib ki, ailə institutu hüquqi, sosial, mənəvi və ənənəvi normalara əsaslanan bir sistemdir:

"Ailə həm hüquqi, həm ictimai, həm də milli-mənəvi dəyərlərin bir araya gəldiyi əsas institutlardan biridir. Sosial şəbəkələrdə uşaq və yeniyetmələrin ənənəvi, mənəvi və hüquqi normalardan kənara çıxan davranışları baş verdikdə, bunun mənəvi məsuliyyəti valideynlərin üzərinə düşür. Eyni zamanda, həmin şəxslər azyaşlı olduqları üçün onların hüquqi məsuliyyətini də valideynlər daşıyırlar. Bu baxımdan tətbiq olunan yaş məhdudiyyətləri valideyn nəzarətini əvəz etmir və valideynlərin arxayınlaşması üçün əsas yaratmır. Əksinə, valideynlər tətbiq olunan məhdudiyyətlər və aidiyyəti qurumlarla paralel şəkildə fəaliyyət göstərməli, bu mexanizmlərin ailə daxilində və uşaqların sosial şəbəkələrdən istifadəsində necə tətbiq olunduğuna ciddi nəzarət etməlidirlər".

Röyalə Xəyal

Telegramda izləyin