Ödənişli əsaslarla qəbul olan bu şəxslərə GÜZƏŞT ediləcək - AÇIQLAMA

Ali təhsildə sosial dəstək mexanizmlərinin genişləndirilməsi istiqamətində tətbiq olunan güzəştlər təhsil haqqının ödənilməsi ilə bağlı imkanları məhdud olan tələbələr üçün mühüm əhəmiyyət daşıyır. Xüsusilə ödənişli ixtisaslara qəbul olunsalar da, müəyyən kateqoriyalara aid olduqları üçün təhsil haqqından azad edilən tələbələrlə bağlı qaydalar cəmiyyətdə maraq doğurur. Bəs, bu güzəştlərin əhatə dairəsi hansı meyarlar əsasında müəyyən edilir və belə bir mexanizm ali təhsilə əlçatanlığın artırılmasına necə təsir göstərir?
Məsələ ilə bağlı Sonxeber.az-a açıqlama verən təhsil eksperti Elçin Əfəndi bildirib ki, burada nəzərdə tutulan güzəştlər dövlət başçısının müvafiq sərəncamlarına əsasən ödənişli əsaslarla ali və orta ixtisas təhsil müəssisələrinə qəbul olunan müəyyən kateqoriyadan olan vətəndaşlara şamil edilir.

"Bunlara Ermənistanın işğalı nəticəsində doğma yurdlarından didərgin düşmüş məcburi köçkünlər, şəhid ailələrinin üzvləri, sağlamlıq imkanları məhdud şəxslər, müharibə iştirakçıları, I və II qrup əlilliyi olan şəxslər daxildir. Eyni zamanda, cənab Prezidentin müvafiq sərəncamı ilə minatəmizləyənlərə, eləcə də həlak olmuş minatəmizləyənlərin övladlarına da təhsil haqqı ilə bağlı güzəştlər tətbiq olunub. Qeyd edim ki, bu güzəştlər ödənişli əsaslarla təhsil alan şəxsləri əhatə edir və ali təhsilin bakalavr və magistratura pillələrinə, eləcə də orta ixtisas təhsilinə qəbul olunanlara şamil edilir. Bu yanaşma təhsilin əlçatanlığının təmin edilməsinə xidmət edir".

Ekspert bildirib ki, bununla yanaşı, sosial həssas əhali qruplarına aid olan vətəndaşlar üçün də əlavə dəstək mexanizmləri mövcuddur:

"Bu istiqamətdə cənab Prezidentin sərəncamı ilə Təhsil Tələbə Krediti Fondu yaradılıb. Nəticədə həmin kateqoriyaya aid tələbələr sosial tələbə krediti əldə edə bilirlər. Bu kreditlər aşağı faiz dərəcəsi ilə təqdim olunur və məzun olduqdan iki il sonra geri ödənilməyə başlanılır. Eyni zamanda, akademik göstəriciləri yüksək olan tələbələr üçün müəyyən güzəştlər tətbiq edilir və onlar bəzi hallarda götürdükləri təhsil kreditini geri ödəməkdən azad olunurlar".

Onun sözlərinə görə, ümumilikdə, bütün bu mexanizmləri nəzərə aldıqda hər il bakalavr pilləsində 35 mindən çox tələbə ödənişsiz təhsil almaq imkanı əldə edir:

"Magistratura səviyyəsində bu göstərici təxminən 7-8 min nəfər təşkil edir. Orta ixtisas təhsili üzrə həm 9 illik, həm də 11 illik təhsil bazasında hər il təxminən 10-12 min nəfər ödənişsiz təhsil almaq hüququ qazanır. Peşə təhsili istiqamətində isə bu rəqəm 15-20 min nəfər civarındadır. Bütün bunlar göstərir ki, həyata keçirilən güzəştlər və dəstək mexanizmləri ölkədə təhsilin əlçatanlığının artırılmasına xidmət edir və ali, orta ixtisas və peşə təhsili almaq istəyən vətəndaşlar üçün mühüm imkanlar yaradır".

Röyalə Xəyal

Telegramda izləyin