Emin Ağalarov istirahət mərkəzindəki bədbəxt hadisədən danışdı

Xalq artisti, biznesmen Emin Ağalarov "Sea Breeze" istirahət mərkəzində azyaşlı uşağın ölümü ilə nəticələnən bədbəxt hadisə barədə açıqlama verib.

Oxu.Az xəbər verir ki, o, bununla bağlı rəsmi sosial şəbəkə hesabında paylaşım edib.

"Sea Breeze" akvaparkında baş verən faciəli qəzada bir uşaq həlak oldu.

Şəxsən öz adımdan və bütün "Sea Breeze" komandası adından ailəyə dərin və səmimi başsağlığı verirəm. Hazırda heç bir söz valideynlərin və yaxınlarının ağrısını azalda bilməz.

Hazırda hadisənin bütün hallarını, o cümlədən uşağın hovuzun texniki zonasına, hasarların arxasında su nasoslarının işlədiyi yerə niyə girdiyini müəyyən etmək üçün araşdırma aparılır.

Biz istintaqla tam əməkdaşlıq edirik.

Uşaqların və böyüklərin təhlükəsizliyi həmişə "Sea Breeze" üçün mütləq prioritet və öhdəlik olub və olaraq qalır. Kurortun bütün əraziləri və obyektləri Fövqəladə Hallar Nazirliyi və müvafiq orqanlar tərəfindən müntəzəm olaraq yoxlanılır. Akvapark üçüncü mövsümündədir və 350 000-dən çox qonağı qəbul edib.

Bu hadisəni nəzərə alaraq, bütün təhlükəsizlik tədbirləri daha da nəzərdən keçiriləcək və gücləndiriləcək.

"Sea Breeze" komandası və şəxsən mən ailəyə bütün lazımi dəstək və yardımı göstərəcəyik", - deyə E.Ağalarov bildirib.

Telegramda izləyin