İrpendən gələn yüksək qiymət: Azərbaycanın uğurlu xarici siyasət kursunun yeni göstəricisi

Azərbaycan Respublikasının Prezidenti İlham Əliyevə "İrpen şəhərinin fəxri vətəndaşı" vəsiqəsinin təqdim edilməsi ölkəmizin beynəlxalq nüfuzunun və Azərbaycan-Ukrayna münasibətlərinin inkişafının diqqətçəkən göstəricilərindən biri kimi qiymətləndirilə bilər.

Bu addım, ilk növbədə, Azərbaycan Prezidentinin həyata keçirdiyi ardıcıl, çevik və milli maraqlara əsaslanan xarici siyasət kursuna verilən yüksək qiymətin ifadəsidir. Son illərdə Azərbaycan müxtəlif dövlətlərlə münasibətlərini qarşılıqlı hörmət, etimad və əməkdaşlıq prinsipləri əsasında inkişaf etdirərək beynəlxalq arenada etibarlı tərəfdaş mövqeyini daha da möhkəmləndirib.

İrpen şəhəri ilə bağlı məsələ isə xüsusi humanitar məna daşıyır. Ukraynanın ağır sınaqlarla üzləşdiyi bir dövrdə Azərbaycanın bu şəhərə göstərdiyi diqqət və dəstək ölkəmizin humanizm prinsiplərinə sadiqliyini nümayiş etdirir. İrpendə Azərbaycanın iştirakı ilə həyata keçirilən bərpa və humanitar təşəbbüslər iki xalq arasında həmrəylik və dostluq münasibətlərinin mühüm nümunəsidir.

Prezident İlham Əliyevin xarici siyasət strategiyasının əsas xüsusiyyətlərindən biri Azərbaycanın milli maraqlarının qətiyyətlə qorunması ilə yanaşı, beynəlxalq əməkdaşlığın genişləndirilməsidir. Azərbaycan bu siyasət nəticəsində müxtəlif siyasi və iqtisadi mərkəzlərlə qarşılıqlı faydalı münasibətlər qurub, regional və qlobal əhəmiyyətli layihələrdə fəal iştirak edib.

Ölkəmizin enerji, nəqliyyat, logistika və humanitar sahələrdə irəli sürdüyü təşəbbüslər Azərbaycanın beynəlxalq tərəfdaşlar üçün əhəmiyyətini artırır. Xüsusilə Avropanın enerji təhlükəsizliyinə verilən töhfə, Şərq-Qərb və Şimal-Cənub nəqliyyat dəhlizlərində Azərbaycanın rolu ölkəmizin geosiyasi əhəmiyyətini daha da yüksəldib.
Azərbaycanın Ukrayna ilə münasibətləri də bu ümumi xarici siyasət xəttinin mühüm istiqamətlərindən biridir. İkitərəfli əlaqələrin siyasi, iqtisadi və humanitar sahələrdə inkişaf etdirilməsi qarşılıqlı etimadın möhkəmlənməsinə xidmət edir. İrpen şəhərinin Azərbaycan Prezidentinə verdiyi fəxri vətəndaşlıq statusu da bu münasibətlərin ictimai və humanitar müstəvidə əks-sədası kimi diqqət çəkir.

Burada mühüm məqam ondan ibarətdir ki, Azərbaycanın xarici siyasəti yalnız diplomatik görüşlər və siyasi bəyanatlarla məhdudlaşmır. Konkret humanitar layihələr, bərpa təşəbbüsləri və xalqlar arasında əlaqələrin gücləndirilməsi də bu siyasətin mühüm tərkib hissəsidir. İrpen nümunəsi də məhz belə yanaşmanın göstəricilərindən biri kimi ortaya çıxır.

Prezident İlham Əliyevin rəhbərliyi ilə Azərbaycan beynəlxalq münasibətlər sistemində öz mövqeyini gücləndirməklə yanaşı, milli maraqlarını qoruyan, müstəqil qərarlar qəbul edən və tərəfdaşları ilə qarşılıqlı faydalı əməkdaşlığa üstünlük verən dövlət kimi çıxış edir.

"İrpen şəhərinin fəxri vətəndaşı" vəsiqəsinin təqdim edilməsi bu baxımdan yalnız bir fəxri adın verilməsi deyil, həm də Azərbaycanın humanitar siyasətinə və beynəlxalq əməkdaşlıq xəttinə verilən ictimai qiymət kimi dəyərləndirilə bilər.
Bu hadisə bir daha göstərir ki, Azərbaycanın düşünülmüş və məqsədyönlü xarici siyasət kursu ölkəmizin beynəlxalq nüfuzunun möhkəmlənməsinə, dost və tərəfdaş dövlətlərlə əlaqələrin genişlənməsinə, Azərbaycan həqiqətlərinin dünya ictimaiyyətinə çatdırılmasına və ölkəmizin qlobal proseslərdə rolunun artmasına xidmət edir.

Bəhruz Quliyev, Səs qəzetinin baş redaktoru

Telegramda izləyin