Azərbaycanın dünya birliyinə inteqrasiyası və beynəlxalq əməkdaşlığın inkişafı

"Azərbaycan Respublikasının müstəqillik əldə etdikdən sonra qarşıya qoyduğu əsas strateji məqsədlərdən biri dünya birliyinə fəal inteqrasiya etmək, region ölkələri və digər dövlətlərlə qarşılıqlı faydalı münasibətlər qurmaq, beynəlxalq və regional təşkilatlarla əməkdaşlığı davamlı şəkildə inkişaf etdirmək olub. Bu istiqamətdə həyata keçirilən ardıcıl və məqsədyönlü siyasət Azərbaycanın beynəlxalq münasibətlər sistemində mövqeyinin möhkəmlənməsinə mühüm töhfə verib".

Bunu Sonxeber.az-a danışan deputat Jalə Əliyeva bildirib.

Deputat qeyd edib ki, Azərbaycanın xarici siyasətinin əsas prinsiplərindən biri milli maraqların qorunması ilə yanaşı, dövlətlərarası münasibətlərdə qarşılıqlı hörmət, suverenliyə və ərazi bütövlüyünə ehtiram, bərabərhüquqlu əməkdaşlıq və konstruktiv dialoq prinsiplərinə üstünlük verilməsidir:

"Bu yanaşma ölkənin müxtəlif siyasi və iqtisadi platformalarda etibarlı tərəfdaş kimi qəbul olunmasına şərait yaradıb. Azərbaycanın yerləşdiyi geostrateji məkan onun regional əməkdaşlıq proseslərində fəal iştirakını zəruri edir. Cənubi Qafqaz ölkələri, Mərkəzi Asiya dövlətləri, Türkiyə, İran, Gürcüstan və digər qonşu ölkələrlə münasibətlərin inkişaf etdirilməsi Azərbaycanın xarici siyasətinin mühüm istiqamətlərindəndir.

Xüsusilə Azərbaycan-Türkiyə münasibətləri strateji tərəfdaşlığın nümunəsi kimi diqqət çəkir. İki ölkə arasında siyasi, iqtisadi, enerji, nəqliyyat, müdafiə, humanitar və digər sahələrdə əməkdaşlığın genişlənməsi regional sabitliyə və iqtisadi inteqrasiyaya mühüm imkanlar yaradır.Gürcüstanla əməkdaşlıq da Azərbaycanın regional və beynəlxalq nəqliyyat-enerji layihələrində mühüm rolunu gücləndirir. Bakı-Tbilisi-Ceyhan neft kəməri, Cənub Qaz Dəhlizi, Bakı-Tbilisi-Qars dəmir yolu və digər layihələr Azərbaycanın regionda enerji və nəqliyyat qovşağı kimi mövqeyini möhkəmləndirən əsas amillərdəndir".

Deputat vurğulayıb ki, Azərbaycan BMT, Qoşulmama Hərəkatı, İslam Əməkdaşlıq Təşkilatı, Türk Dövlətləri Təşkilatı, ATƏT, Avropa Şurası və digər beynəlxalq və regional qurumlarla əməkdaşlığını inkişaf etdirir:

"Bu platformalar Azərbaycan üçün ölkənin mövqeyini beynəlxalq ictimaiyyətə çatdırmaq, qlobal və regional məsələlərin müzakirəsində iştirak etmək baxımından mühüm imkanlar yaradır.Azərbaycanın Qoşulmama Hərəkatına sədrliyi dövründə irəli sürdüyü təşəbbüslər də ölkənin beynəlxalq əməkdaşlığa verdiyi önəmin göstəricilərindən biri kimi qiymətləndirilə bilər. Pandemiya dövründə beynəlxalq həmrəyliyin gücləndirilməsi istiqamətində göstərilən təşəbbüslər Azərbaycanın çoxtərəfli diplomatiyada fəallığını nümayiş etdirib.

Azərbaycanın dünya birliyinə inteqrasiyasında enerji siyasəti xüsusi əhəmiyyət daşıyır. Ölkənin enerji resurslarının dünya bazarlarına çıxarılması ilə yanaşı, Avropanın enerji təhlükəsizliyinə töhfə verməsi Azərbaycanı mühüm enerji tərəfdaşlarından birinə çevirib.Son illərdə yaşıl enerji istiqamətində həyata keçirilən layihələr isə Azərbaycanın beynəlxalq enerji əməkdaşlığının yeni mərhələyə keçdiyini göstərir. Bərpaolunan enerji potensialının inkişaf etdirilməsi və yaşıl enerjinin ixracı ilə bağlı təşəbbüslər ölkənin gələcəkdə də regional enerji transformasiyasında fəal iştirakına imkan yaradır. Bununla yanaşı, Azərbaycanın Şərq-Qərb və Şimal-Cənub nəqliyyat dəhlizlərində yerləşməsi ölkənin logistika imkanlarını artırır. Bakı Beynəlxalq Dəniz Ticarət Limanı, dəmir yolları, avtomobil yolları və digər infrastruktur layihələri Azərbaycanın beynəlxalq ticarət əlaqələrinin genişlənməsinə xidmət edir".

Deputat söyləyib ki, Dünya birliyinə inteqrasiya yalnız siyasi və diplomatik münasibətlərlə məhdudlaşmır. Xarici investisiyaların cəlb edilməsi, qeyri-neft sektorunun inkişafı, ticarət əlaqələrinin genişləndirilməsi, turizm, təhsil, elm və mədəniyyət sahələrində əməkdaşlıq Azərbaycanın beynəlxalq əlaqələrinin mühüm istiqamətləridir.
Humanitar diplomatiya da ölkələr arasında qarşılıqlı anlaşmanın möhkəmlənməsində mühüm rol oynayır. Azərbaycan müxtəlif beynəlxalq tədbirlərə, forumlara və mədəni layihələrə ev sahibliyi etməklə özünün açıq dialoqa və beynəlxalq əməkdaşlığa hazır olduğunu nümayiş etdirir.

Azərbaycanın dünya birliyinə inteqrasiyasının qarşıdakı mərhələsində əsas məqsədlərdən biri mövcud tərəfdaşlıqları daha da dərinləşdirmək və yeni əməkdaşlıq imkanları yaratmaqdır. Xüsusilə rəqəmsal iqtisadiyyat, yaşıl enerji, nəqliyyat-logistika, innovasiya, təhsil və yüksək texnologiyalar sahəsində beynəlxalq əməkdaşlığın genişləndirilməsi ölkənin inkişaf perspektivləri baxımından böyük əhəmiyyət daşıyır.Azərbaycanın regional əməkdaşlıq təşəbbüsləri, nəqliyyat və enerji layihələri, beynəlxalq təşkilatlarda fəal iştirakı onun xarici siyasətinin çoxşaxəli xarakterini göstərir. Bu siyasətin əsas məqsədi Azərbaycanın milli maraqlarını qorumaqla yanaşı, ölkənin beynəlxalq mövqeyini daha da möhkəmləndirmək, regionda sülh və sabitliyə, iqtisadi inkişaf və qarşılıqlı faydalı əməkdaşlığa töhfə verməkdir. Ümumiyyətlə, Azərbaycanın dünya birliyinə inteqrasiyası davamlı və çoxistiqamətli prosesdir. Regional tərəfdaşlıq, beynəlxalq təşkilatlarla əməkdaşlıq, enerji və nəqliyyat diplomatiyası, iqtisadi əlaqələrin genişləndirilməsi və humanitar münasibətlərin inkişafı ölkənin qlobal siyasi və iqtisadi sistemdə mövqeyinin möhkəmlənməsinə xidmət edir. Bu istiqamətlərin hər biri Azərbaycanın gələcək inkişafında və beynəlxalq əməkdaşlıq imkanlarının genişləndirilməsində mühüm rol oynayır".

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi" mövzusuna uyğun olaraq dərc edilir.

Aysel Yusifqızı

Telegramda izləyin