Ata narkotik istifadəsinə görə mübahisə etdiyi oğlunu öldürdü - VİDEO

İzmirin Qaziemir rayonunda narkotik maddə istifadəsi ilə bağlı ata ilə oğlu arasında yaranan mübahisə faciə ilə nəticələnib. 46 yaşlı B.K. 21 yaşlı oğlu Furkan K.-nı ov tüfəngi ilə vuraraq öldürüb.

Sonxeber.az xarici mediaya istinadla xəbər verir ki, hadisə dünən saat 21:15 radələrində Qaziemir rayonunun Aktepe məhəlləsində baş verib. Məlumata görə, B.K. ilə oğlu Furkan K. arasında gəncin narkotik maddə istifadəsi ilə bağlı mübahisə yaranıb. Qısa müddətdə böyüyərək davaya çevrilən mübahisə zamanı ata evdə olan pompalı tüfəngi götürərək oğluna atəş açıb.

Tüfəngdən açılan atəş nəticəsində saçmalar Furkan K.-nın sinə nahiyəsinə dəyib. Ağır yaralanan gənc hadisə yerində yerə yıxılıb.

Ətrafdakı sakinlərin silah səslərini eşidərək polisə və təcili tibbi yardım xidmətinə məlumat verməsindən sonra əraziyə polis və tibbi briqadalar göndərilib. Həkimlərin müayinəsi zamanı Furkan K.-nın həyatını itirdiyi müəyyənləşib.

Gəncin meyiti hadisə yeri üzrə araşdırma və prokurorun baxışından sonra ekspertiza üçün İzmir Ədli Tibb Qurumu morquna aparılıb.

Oğlunu vurduqdan sonra hadisə yerindən uzaqlaşan B.K. qısa müddət sonra cinayətdə istifadə etdiyi pompalı tüfənglə polis bölməsinə gedərək təslim olub. Silah müsadirə edilərək maddi sübut kimi götürülüb.

Saxlanılan B.K.-nın polis bölməsində ifadəsinin alındığı və araşdırmanın davam etdiyi bildirilir.

Telegramda izləyin