İcra hakimiyyəti binasında silahlı insident - VİDEO

Antalyanın Kepez rayonunda İcra hakimiyyəti binasında iki tapança ilə atəş açaraq qorxu yaradan İlçe Milli Təhsil İdarəsinin əməkdaşı M.Y. barəsində aparılan inzibati araşdırma başa çatıb. Məmura maaşdan tutulma və vəzifə pilləsində irəliləyişin dayandırılması cəzası verilib. O, Tuncelinin Ovacık rayonuna təyin edilib.

Sonxeber.az xarici mediaya istinadla xəbər verir ki, hadisə martın 16-da Kepez İcra hakimiyyəti binasında baş verib. M.Y. iş yerinə iki tapança ilə gəlib və saat 11 radələrində dəhlizə çıxaraq atəş açmağa başlayıb. Silah səslərindən sonra binadakı əməkdaşlar və vətəndaşlar təxliyə edilib. M.Y. isə özünü otağa kililəyib.

Hadisə yerinə çox sayda polis əməkdaşı göndərilib. İntihar edəcəyini bildirən M.Y. təxminən 4,5 saat davam edən danışıqlardan sonra təslim olub. Onun barəsində həm hüquqi, həm də inzibati araşdırma başlanıb.

Hadisə zamanı çəkilən görüntülərdə M.Y.-nin hər iki əlində tapança ilə dəhlizdə hərəkət etdiyi, insanları binadan çıxmaları barədə xəbərdar etdikdən sonra bir neçə dəfə atəş açdığı görünür. M.Y. hadisədən əvvəl sosial media hesabında paylaşdığı videoda isə iş yerində mobbinqə məruz qaldığını iddia etmişdi.

Araşdırma təxminən 5 ay sonra tamamlanıb. Lakin M.Y. səhhəti ilə bağlı davamlı tibbi arayış aldığı və işə çıxmadığı üçün ona verilən cəza və yeni təyinat barədə rəsmi bildiriş çatdırıla bilməyib.

Sonuncu dəfə ərizə təqdim etmək üçün İcra hakimiyyəti binasına gələn M.Y.-nin polis əməkdaşları ilə mübahisə etdiyi bildirilir. Onun haqqında uzaqlaşdırma qərarı olduğunu bildirən polis əməkdaşları M.Y.-ni binaya buraxmayıb. O isə ərazidən uzaqlaşıb.

Telegramda izləyin