Alacağınız evin gələcəkdə plana düşüb-düşməyəcəyini belə öyrənmək olar - Ekspert AÇIQLADI

Bakıda şəhərsalma və yenidənqurma layihələrinin genişlənməsi fonunda bəzi ərazilərin gələcəkdə söküntü və ya yenidənqurma zonasına düşə biləcəyi ilə bağlı müzakirələr artır. Bakı şəhərinin 2040-cı ilədək Baş Planı nəqliyyat və sosial infrastrukturun inkişafı, ərazilərin yenidən təşkili, abadlaşdırma və yaşayış fondunun yenilənməsi kimi istiqamətləri əhatə edir. Bu baxımdan, belə ərazilərdən əmlak almaq alıcı üçün həm hüquqi, həm də maliyyə riskləri yarada bilər.

Bəs, vətəndaş ev və ya torpaq almazdan əvvəl həmin əmlakın gələcək şəhərsalma layihələrinə düşüb-düşməyəcəyini necə yoxlaya bilər, söküntü halında kompensasiya hansı prinsiplərlə müəyyənləşdirilir və alıcı öz hüquqlarını qorumaq üçün müqavilə və sənədlərdə hansı məqamlara xüsusi diqqət yetirməlidir?
Məsələ ilə bağlı Sonxeber.az-a açıqlama verən əmlak məsələləri üzrə ekspert Elnur Azadov bildirib ki, bu, olduqca qəliz məsələdir:

"Nəzərə alsaq ki, dövlət hesabına sökülən ərazilər təxminən bəllidir, burada kompensasiya hamıya eyni qaydada verilir. Məsələn, şəhərin mərkəzi hissəsi olmasına baxmayaraq, kompensasiya 2700 manat məbləğində müəyyənləşdirilir. Baxmayaraq ki, həmin ərazidə həm köhnə, aşınmış, ümumiyyətlə yaşamaq üçün yararsız, tam qəzalı vəziyyətdə olan əmlaklar var, eyni zamanda orta səviyyədə, tam aşınmamış, yaşamaq üçün yararlı binalar da mövcuddur. Hətta həmin binalarda yüksək təmirli mənzillər də ola bilər. Gələcəkdə bütün bu əmlakların eyni qiymətlə qiymətləndirilməsi, qəzalı bina ilə təmirli mənzilin eyni səviyyədə tutulması müəyyən risklər yaradır".

Ekspert bildirib ki, buna baxmayaraq, daha əlverişli hesab oluna biləcək ərazilər də var:

"Bunlar tikinti şirkətləri tərəfindən söküntü aparılan ərazilərdir. Lakin hər tikinti şirkətinin söküntü işlərinə öz yanaşması var. Şirkətlərin əksəriyyəti vəsaitə qənaət etməyə çalışır, əlavə sahələrə görə kompensasiya vermir və müxtəlif yollarla vətəndaşlarla razılaşmağa çalışırlar. Yəni burada bir qədər bəxt məsələsi də var. Bu baxımdan, mən bu sektora investisiya etməyi bir qədər riskli hesab edirəm. Amma plana düşəcək və söküntü nəticəsində daha əlverişli əmlak əldə ediləcək ərazilər var".

Onun sözlərinə görə, beşmərtəbəli binaların söküntüyə məruz qaldığı və plana düşdüyü ərazilərdə köhnə mənzillə əvəzində təqdim olunan yeni mənzil arasında sahə baxımından ən azı 20-25 faiz fərq yaranıb:

"Daha müasir əmlak ərsəyə gəldiyinə görə köhnə, plana düşən əmlakla onun əvəzinə verilən yeni əmlak arasında orta hesabla 20-25 faizdən 30 faizə qədər fərq yarana bilir. Bu baxımdan belə ərazilərdə risk daha azdır. Məsələn, standart çoxmənzilli bina, xüsusilə "Xruşşov" tipli beşmərtəbəli bina plana düşərsə, burada riskin daha az olduğunu hesab edirəm".

Röyalə Xəyal

Telegramda izləyin