Bir-birinə yaxın tikilən obyektlər TƏHLÜKƏ SAÇIR - AÇIQLAMA

Obyektlərin bir-birinə həddindən artıq yaxın və ya bitişik tikilməsi yanğın zamanı alovun və tüstünün qonşu tikililərə daha sürətlə yayılması, həmçinin xilasedicilərin əraziyə girişinin çətinləşməsi kimi risklər yarada bilər. Buna görə tikinti zamanı obyektlər arasındakı məsafə, yanğına davamlılıq və digər təhlükəsizlik tələblərinin nəzərə alınması vacibdir.

Bəs, obyektlərin bir-birinə çox yaxın və ya bitişik tikilməsi hansı təhlükələr yaradır, yanğın zamanı alovun bir tikilidən digərinə keçməsinin qarşısını almaq üçün obyektlər arasında hansı məsafə və təhlükəsizlik normalarına əməl olunmalıdır?
Mövzu ilə bağlı Sonxeber.az-a açıqlama verən inşaat məsələləri üzrə ekspert Muxtar Ərturan bildirib ki, obyektlərin bir-birinə həddindən artıq yaxın tikilməsi yalnız şəhərsalma problemi deyil, birbaşa yanğın təhlükəsizliyi məsələsidir.

"Yanğın zamanı alov təkcə birbaşa təmasla deyil, yüksək temperaturun şüalanması, tüstü və yanan hissəciklər vasitəsilə də qonşu tikiliyə keçə bilər.
Buna görə Azərbaycan normalarında binalar arasında yanğına qarşı ara məsafələri onların odadavamlılıq dərəcəsinə görə müəyyən edilir. Yaşayış və ictimai binalarda bu göstəricilər konkret konstruksiyadan asılı olaraq 6 metrdən başlayaraq 8, 10 və bəzi hallarda 15 metrə qədər yüksəlir. Yəni "bütün binalar arasında 6 metr kifayətdir" demək texniki baxımdan doğru deyil".

Ekspert bildirib ki, bitişik tikinti də mümkündür, amma bu, iki binanı sadəcə bir-birinə söykəmək demək deyil:

"Şəhərsalma və Tikinti Məcəlləsi qonşu binalar arasındakı məsafənin az olduğu hallarda yanğının yayılmasının qarşısını almaq üçün odadavamlı divarların tətbiqini nəzərdə tutur.
Digər kritik məsələ yanğınsöndürmə texnikasının binaya çıxışıdır. Normativ yanaşmada yanğın avtomobillərinin binaya yaxınlaşması və avtonərdivan və ya avtoqaldırıcı vasitəsilə insanların xilas edilməsi üçün sərbəst sahə saxlanılmalıdır. Bu keçidlərin sonradan avtomobillər, hasarlar və ya əlavə tikililərlə bağlanması çox ciddi təhlükə yaradır".

Onun sözlərinə görə, tikintidə hər boş kvadratmetri bina ilə doldurmaq olmaz:

"Binalar arasındakı məsafə itirilmiş torpaq deyil, yanğın zamanı insanların həyatını və yanğınsöndürənlərin müdaxilə imkanını qoruyan təhlükəsizlik zonasıdır".

Röyalə Xəyal

Telegramda izləyin