Xəstələnəndə toyuq şorbası yemək həqiqətən faydalıdırmı? Dietoloqların CAVABI

Özünüzü pis hiss etdiyiniz zaman bir kasa isti toyuq şorbası vəziyyətinizi yüngülləşdirə bilər. Bulyon orqanizmdə maye ehtiyatını bərpa etməyə kömək edir, istilik burun tutulmasını azalda bilər, bəzi inqrediyentlər isə orqanizmi faydalı qida maddələri ilə təmin edir.

Lent.az xarici mediaya istinadən xəbər verir ki, toyuq şorbasının spesifik antiviral və ya iltihabəleyhinə təsirini sübut edən araşdırmalar çox deyil. Bununla belə, sağalma dövründə kifayət qədər maye qəbul etmək xəstəlik zamanı gücün qorunmasına kömək edə bilər.

"Mən soyuqdəymədən sağalma prosesində məhz toyuq şorbasının konkret faydalarını araşdıran çox sayda başqa tədqiqat tapmadım", - Alissa Payk bildirib.

Qeyd olunur ki, toyuq şorbasının sağlamlığa faydası onun tərkibindən asılıdır. Şorbanın tərkibinə toyuq bulyonu, ət və tərəvəzlər, o cümlədən kök, sarımsaq, soğan və kərəviz daxil ola bilər. Dietoloq və Kaliforniya Dövlət Universitetinin müəllimi Amanda Sausedanın sözlərinə görə, bu faydalı inqrediyentlər toyuq şorbasını ayrı-ayrı komponentlərinin sadə cəmindən daha dəyərli edə bilər.

"Toyuq şorbasının tərkibindəki inqrediyentlər vitaminlər və antioksidantlarla zəngindir. Bunlar orqanizmin təbii bərpa prosesinə kömək edə bilər. Kök immun sisteminin sağlamlığı, həmçinin mədə-bağırsaq traktını örtən hüceyrələr üçün mühüm əhəmiyyət daşıyan A vitamininin mənbəyidir. Bu hüceyrələr orqanizmin ilk müdafiə xəttidir", - Sauseda "Nutrients" jurnalında dərc edilən araşdırmaya istinadla deyib.

Soğan və sarımsaq antiviral və iltihabəleyhinə xüsusiyyətlərə malikdir. Toyuq sümüyündən hazırlanmış bulyon kalium, fosfor və xlorid kimi elektrolitlərin əhəmiyyətli miqdarını ehtiva edir. Bu maddələr xəstəlik zamanı yarana bilən susuzlaşma hallarında faydalı ola bilər.

Toyuq şorbası həqiqətən iltihabəleyhinə təsir göstərirmi?

Dietoloq Sara Qaronenin sözlərinə görə, hazırda toyuq şorbasının özünün iltihabəleyhinə təsir göstərdiyini təsdiqləyən araşdırmalar yoxdur. Lakin onun tərkibindəki kök, sarımsaq və soğan kimi məhsulların belə xüsusiyyətləri var.

Maksimum faydanı necə əldə etmək olar?

Sauseda toyuq şorbasını ev şəraitində hazırlamağı məsləhət görür. Belə olduqda iki mühüm amili natriumun və ədviyyatların miqdarını nəzarətdə saxlamaq mümkündür. Onun sözlərinə görə, mağazada satılan bəzi hazır şorbaların tərkibində həddindən artıq natrium ola bilər. Bu isə arterial təzyiq üçün zərərli olmaqla yanaşı, bağırsaqları da qıcıqlandıra bilər. Hazır şorba seçildiyi halda isə ona əlavə tərəvəz qatmaqla antioksidantların miqdarını artırmaq tövsiyə olunur.

Toyuq şorbasını yaxşı isti halda yemək məsləhətdir. Nəşrin yazdığına görə, isti şorba insanda müsbət emosional reaksiya yarada bilər və özünü yaxşı hiss etmədiyi vaxt bu da əlavə üstünlükdür.

Telegramda izləyin