Sürücülük vəsiqəsini 20 gün əvvəl almışdı: 18 yaşlı gənc motosiklet qəzasında öldü - VİDEO

Türkiyənin Antalya şəhərində motosiklet qəzası 18 yaşlı Mehmet Ege Sulanın həyatına son qoyub. Gəncin sürücülük vəsiqəsini cəmi 20 gün əvvəl aldığı məlum olub.

Sonxeber.az xarici mediaya istinadla xəbər verir ki, hadisə Muratpaşa rayonunun Kızılsaray məhəlləsində, Tonguç prospektinin Tonguç yeraltı keçidində gecə saat 23:30 radələrində baş verib.

Məlumata görə, Mehmet Ege Sulanın idarə etdiyi 07 BSA 572 dövlət nömrə nişanlı motosiklet yeraltı keçidə daxil olarkən hələlik müəyyən edilməyən səbəbdən idarəetmədən çıxıb. Sürücü yol kənarındakı yol nişanına çırpılıb. Motosiklet isə təxminən 150 metr sürükləndikdən sonra yolun ortasında dayanıb.

Qəzanı görən digər sürücülər 112 Təcili Çağrı Mərkəzinə məlumat veriblər. Hadisə yerinə polis və təcili tibbi yardım əməkdaşları göndərilib. Tibbi briqadanın müayinəsi zamanı 18 yaşlı Mehmet Ege Sulanın həyatını itirdiyi müəyyənləşib.

Qəza ilə əlaqədar yeraltı keçid bir müddət birtərəfli qaydada nəqliyyatın hərəkətinə bağlanıb. Hadisə yeri üzrə araşdırmalar başa çatdıqdan sonra gəncin cəsədi Antalya Ədli Tibb Qurumu morquna aparılıb.

Təxminən 150 metr sürüklənən motosiklet isə evakuator vasitəsilə dayanacağa aparılıb. Araşdırma zamanı Mehmet Ege Sulanın sürücülük vəsiqəsini cəmi 20 gün əvvəl aldığı məlum olub.

Telegramda izləyin