Formula 1 altı illik fasilədən sonra İstanbula qayıdır - Tarix açıqlandı

Formula 1 yarışları altı illik fasilədən sonra yenidən İstanbulda keçiriləcək.

Qaynarinfo xəbər verir ki, 2027-ci il FIA Formula 1 Dünya Çempionatının təqvimi açıqlanıb. Təqvimə əsasən, "Formula 1 Turkish Grand Prix" 1-3 oktyabr 2027-ci il tarixlərində TOSFED İstanbul Parkda təşkil olunacaq.

İstanbul mərhələsi oktyabrın 1-də sərbəst yürüşlərlə başlayacaq. Oktyabrın 2-də növbəti sərbəst yürüş və sıralanma turu keçiriləcək. Əsas yarış isə oktyabrın 3-də baş tutacaq.

Türkiyənin Formula 1 təqviminə qayıdışı bu ilin aprelində Prezident Rəcəb Tayyib Ərdoğanın iştirakı ilə keçirilən mərasim zamanı elan edilmişdi. Bununla da İstanbul dünyanın ən nüfuzlu avtomobil idmanı yarışlarından birinə yenidən ev sahibliyi edəcək.

Məşhur 8-ci döngə yenidən diqqət mərkəzində

Formula 1 bolidləri 5,3 kilometrlik TOSFED İstanbul Park trasında mübarizə aparacaq. Ötmə imkanlarının çoxluğu, yüksəklik fərqləri və texniki xüsusiyyətləri ilə seçilən trek pilotlar üçün ciddi sınaq hesab olunur.

Trasın ən məşhur hissələrindən biri olan 8-ci döngə isə xüsusilə diqqət çəkir. Bir neçə dönmədən ibarət uzun sol döngə yüksək sürətlə keçilir və pilotlardan yüksək dəqiqlik tələb edir.

Yarışın İstanbulda keçirilməsinin şəhərin idman turizminə, iqtisadiyyatına və beynəlxalq tanıtımına töhfə verəcəyi gözlənilir.

TGA-dan qlobal tanıtım kampaniyası

Formula 1-in Türkiyəyə qayıdışı ilə əlaqədar İstanbulun beynəlxalq səviyyədə tanıdılması istiqamətində də kampaniyalar genişləndiriləcək.

Mədəniyyət və Turizm Nazirliyinin koordinasiyası, Türkiyə Turizm Təbliğat və İnkişaf Agentliyinin (TGA) hazırladığı "Catch It If You Can" tanıtım filmi artıq 571 milyondan çox baxış toplayıb.

Qarşıdakı dövrdə beynəlxalq media layihələri, rəqəmsal kampaniyalar və müxtəlif ölkələrdən kontent yaradıcıları ilə əməkdaşlıqlar vasitəsilə İstanbulun qlobal tanıtımına diqqət artırılacaq.

Formula 1 yarışlarının 2027-2031-ci illərdə TOSFED İstanbul Parkda keçirilməsi nəzərdə tutulur. Yarışların təşkili TOSFED tərəfindən həyata keçiriləcək.

Telegramda izləyin