Bu bitkiləri çarpayınızın yaxınlığından götürün - SƏBƏB

Ev bitkiləri otağa gözəllik qatsa da, bəzi hallarda həşəratlar üçün gizlənəcək yerə çevrilə bilər.

Lent.az xarici mediaya istinadən xəbər verir ki, xüsusilə yatağın yaxınlığında saxlanılan sıx yarpaqlı bitkilər taxtabitləri üçün əlavə sığınacaq yarada bilər.

Mütəxəssislər bildirirlər ki, taxtabitləri bitkilərlə qidalanmır. Onların əsas qidası insan və heyvan qanıdır. Lakin çoxsaylı yarpaq və gövdələr həşəratların gizlənməsi üçün əlverişli mühit yarada bilər.

Bu baxımdan qıjı, fikus, sarmaşıq, drasena və səhləb kimi bitkilər daha çox diqqət çəkir. Bununla belə, məhz bu bitkilərin taxtabitiləri digər bitkilərdən daha çox cəlb etdiyini sübut edən kifayət qədər dəlil yoxdur.

Taxtabitləri bitkinin yarpaq və gövdəsində, dibçəyin ətrafında və altında gizlənə bilər. Onlar torpaqda yaşamırlar.

Əgər evdə taxtabitindən şübhələnirsinizsə, ilk növbədə çarpayı, döşəyin tikişləri, çarpayının karkası, başlığı və mebel aralıqları yoxlanmalıdır. Çünki bu həşəratlar əsasən insanın yatdığı yerə yaxın ərazilərdə gizlənirlər.

Yataq otağındakı bitkilərin də dibçəyinin altını, yarpaqlarını və gövdəsini yoxlamaq tövsiyə olunur. Tünd nöqtələr, qabıq qalıqları və həşəratların özü onların varlığının əlaməti ola bilər.

Yataq dəstində pas rənginə bənzər qırmızı ləkələr və kiçik tünd izlər də taxtabitilərin əlamətlərindən sayıla bilər. Lakin yalnız bədəndə dişləmə izlərinin olması onların evdə olduğunu dəqiq sübut etmir.

Mütəxəssislər qeyd edirlər ki, taxtabiti əlaməti yoxdursa, ev bitkilərini atmağa ehtiyac yoxdur. Sadəcə çox sıx bitkiləri çarpayının birbaşa yanında saxlamaq məsləhət görülmür.

Əsas məsələ yatağın ətrafını səliqəli saxlamaq və həşəratların gizlənə biləcəyi yerləri mütəmadi yoxlamaqdır.

Telegramda izləyin