Sel fəlakətindən 5 il sonra evin yalnız damı torpaqdan görünür

Türkiyənin Kastamonu vilayətinin Bozkurt rayonunda 2021-ci ildə baş verən dağıdıcı selin izləri hələ də qalmaqdadır. Bayramqazı kəndində yerləşən üçmərtəbəli binanın demək olar ki, tamamı torpağın altında qalıb, yalnız damı üzə çıxıb.

Sonxeber.az xarici mediaya istinadla xəbər verir ki, 11 avqust 2021-ci ildə Qərbi Qaradəniz bölgəsində baş verən sel fəlakətindən ən çox zərər çəkən ərazilərdən biri Bozkurt olub. Təbii fəlakət nəticəsində 65 nəfər həyatını itirib, 7 nəfər isə itkin düşüb.

Sel zamanı sağ qalan üçmərtəbəli bina Ezine çayının kənarında yerləşir. Çay üzərində qurulan çöküntü bəndinin arxasında lil və torpağın toplanması nəticəsində bina zamanla torpağa qərq olub. Hazırda yalnız damı görünən tikili bölgəyə gələnlərin diqqətini çəkir və fotoşəkillərə düşür.

Yerli sakinlər bildiriblər ki, binanın ətrafındakı kivi bağları da torpaq altında qalıb. Onların sözlərinə görə, vaxtilə yaşayış və kənd təsərrüfatı üçün istifadə olunan ərazi sel fəlakətindən sonra tamamilə dəyişib.

Bölgə sakinləri üçün torpaqdan yalnız damı görünən bina 2021-ci il selinin yaratdığı dağıntıların yadda qalan izlərindən biri olaraq qalır.

Telegramda izləyin