Mənzil bazarında qiymətlər bu səbəbdən ARTIR - AÇIQLAMA

Son dövrlər Azərbaycanda daşınmaz əmlak bazarında qiymətlərin dinamikası yenidən diqqət mərkəzindədir. Mənzil qiymətlərinin formalaşmasına tikinti xərcləri, torpaq sahələrinin qiyməti, ipoteka və kredit imkanları, əhalinin alıcılıq qabiliyyəti, tələb-təklif nisbəti və yeni tikililərin bazara çıxarılması kimi amillər təsir göstərə bilər. Xüsusilə Bakıda mənzilə olan tələbatın dəyişməsi və tikinti xərclərinin artması qarşıdakı dövrdə qiymətlərin istiqamətinə təsir edən əsas faktorlar sırasında ola bilər.

Bəs, Azərbaycanda daşınmaz əmlak bazarında qiymətlərin yenidən artmasına hansı amillər səbəb ola bilər və yaxın dövrdə mənzil qiymətlərinin yüksəlməsini şərtləndirən əsas faktorlar nələrdir?
Mövzu ilə bağlı Sonxeber.az-a açıqlama verən əmlak məsələləri üzrə ekspert Elnur Azadov bildirib ki, qiymətlərin bahalaşması prosesi Bakı şəhərindən başlayıb.

"2021-ci ildən Qarabağ və Şərqi Zəngəzur iqtisadi zonalarında kütləvi tikintilərin başlanması ilə əlaqədar bəzi inşaat materiallarının qiymətləri kəskin bahalaşdı. Ən çox bahalaşan materiallardan biri armatur oldu. Onun bir tonunun qiyməti orta hesabla 780 manatdan 1250 manata qədər yüksəldi. Bu da tikinti şirkətlərinin qiymətləri tədricən artırmasına səbəb oldu. İkinci səbəb isə tikinti şirkətlərinə tətbiq olunan sərt inşaat standartları və ümumiyyətlə, icazələrin kəskin azalması idi. 2016-2018-ci illərdə kütləvi tikinti həcmi böyük idi. Nazirlər Kabinetinin 86 saylı qərarı ilə Bakı şəhərində köhnə yaşayış fondunun sökülməsi ilə bağlı hər rayon icra hakimiyyəti sərəncam verirdi. Sonradan bu səlahiyyətlər Dövlət Şəhərsalma və Arxitektura Komitəsinə verildi. Bundan sonra həmin 86 saylı sərəncam ləğv olundu və tikinti şirkətlərinə verilən icazələrin həcmi dəfələrlə azaldı".

Ekspert bildirib ki, 2016-cı illə 2026-cı ili müqayisə etsək, tikinti həcmi, yəni icazələrin verilməsi 8-10 dəfə azalıb:

"Bu qədər böyük həcmdə icazələrin azalması tikinti şirkətləri arasında rəqabətin ciddi şəkildə azalmasına səbəb oldu. Tikinti şirkətləri də vəziyyətdən sui-istifadə edərək hər il ən azı 15-20 faiz daha yüksək qiymətlərlə mənzilləri bazara çıxarmağa başladılar. Son 5-6 il ərzində daşınmaz əmlakın qiyməti ilkin bazarda, ələlxüsus Bakı şəhərində mənzillər üzrə 80 faizə qədər bahalaşıb. Yəni təxminən 5 il ərzində 80 faizlik bahalaşma baş verib və bu proses hələ də davam edir. Tikinti şirkətlərinə verilən icazələrin sayı hələ də çox azdır, rəqabət ciddi şəkildə pozulub. Buna görə də qiymətlər dayanmadan artır. Nə qədər ki, tikinti şirkətlərinə bu məhdudiyyətlər tətbiq olunacaq, qiymətlər hələ də stabilləşməyəcək. Bunun ümumi iqtisadiyyata da ciddi əks-təsiri var. Həm ipoteka götürənlər, həm İpoteka Fondu, həm ümumilikdə Azərbaycanda biznes mühitinin formalaşması, ümumiyyətlə, bütün Azərbaycan üçün bunun təsirləri var".

Röyalə Xəyal

Telegramda izləyin