Azərbaycan Mərkəzi Asiya ölkələri üçün mühüm tərəfdaşdır

Türkmənistan bizim qardaş ölkəmizdir, türk dövlətidir. Üstəlik, Oğuz türk dövlətidir. Yəni biz eyni dil ailəsindən gəlirik. Əlavə olaraq, bütün tarix boyu, tarixin ən qədim çağlarında belə, türkmənlərlə biz eyni olmuşuq.
Azərbaycan dövləti Türkmənistanla münasibətlərə çox önəm verir. Türkmənistan neytral dövlətdir və Azərbaycan onun bu neytrallıq seçiminə hörmətlə yanaşır. Bilirsiniz ki, Azərbaycan başqa dövlətlərin müstəqil və suveren seçimlərinə həmişə hörmətlə yanaşıb.
Aramızdakı münasibətlərdə heç bir soyuqluq və gərginlik yoxdur. Münasibətlərimiz dostluq münasibətləridir. Ümumiyyətlə, hər iki dövlət və hər iki ölkənin xalqları bir-birinə çox hörmətlə yanaşır. Aramızda doğmalıq və yaxınlıq var. Münasibətlərimiz haqqında mənfi hər hansı bir işarə yoxdur.
Azərbaycan-Türkmənistan münasibətləri baxımından da, Türkiyə ilə bağlı dediyimiz kimi, Türkmənistanla bağlı da eyni fikri söyləyə bilərik: bir millət, iki dövlətik.
Artıq Azərbaycan təkcə Avropa qitəsi üçün deyil, həmçinin Mərkəzi Asiya ölkələri üçün də olduqca mühüm tərəfdaş statusuna sahibdir. Əgər əvvələr ölkəmizlə Asiya ölkələri arasında əlaqələr sadəcə müəyyən əməkdaşlıqdan ibarət idisə, hazırda Azərbaycan bu ölkələrlə mühüm iqtisadi layihələr, infrastruktur planlar üzərində iş aparır. Qazaxıstan və Özbəkistanda son bir neçə ay ərzində Azərbaycanın reallaşdırdığı nəhəng layihələr dediklərimizi tamamilə təsdiq edir.
Azərbaycan Prezidentinin oktyabrın 8-də Türkmənistanın Türkmənbaşı şəhərində Azərbaycan Respublikası və Mərkəzi Asiya Dövlət Başçılarının 8-ci Məşvərət görüşü zamanı səsləndirdiyi fikirlər, xüsusilə burada imzalanmış sənədlər gələcək tərəfdaşlıq üçün vacib əhəmiyyət daşıyır. SİTAT: "Əvvələr Türkmənistanla əlaqələrimiz qarşılıqlı nəzakət və müəyyən məsələlər barədə görüşlər o yana keçmirdi. Son bir neçə il ərzində Azərbaycan Prezidentinin bu ölkə ilə böyük əməkdaşlığa hesablanmış tərəfdaşlıq siyasəti artıq Azərbaycanla Türkmənistanı vacib tərəfdaşlara çevirib. İndi rəsmi Aşqabadla Bakını mühüm regional tərəfdaşlıq əlaqələri, xüsusilə hər iki ölkənin maraqlarına cavab verən enerji siyasəti birləşdirir. Həmçinin Xəzər dənizi və Orta Dəhliz iki ölkənin tranzit potensialını birləşdirən əsas həlqəyə çevrilib. Tam əminliklə demək olar ki, hazırda Azərbaycan Mərkəzi Asiya bölgəsində əsaslı siyasi və iqtisadi təsir imkanlarına sahib dövlətdir. Bu, olduqca mühüm faktdır.

Türkan Cümşüdova - YAP üzvü

Telegramda izləyin