Kim Çen Inın bacısından sərt bəyanat: Cənubi Koreyaya xəbərdarlıq

Şimali Koreya lideri Kim Çen Inın bacısı Kim Yo Conq Cənubi Koreyanı sərhəddəki hərəkətlərinə görə tənqid edib. O, iki ölkə arasındakı sərhəd bölgəsində yaranmış vəziyyəti ciddi adlandıraraq Seula xəbərdarlıq edib.

Sonxeber.az The Mirror-a istinadən xəbər verir ki, Kim Yo Conqun sözlərinə görə, Cənubi Koreya hərbçiləri son aylarda sərhəd yaxınlığında xəbərdarlıq atəşi açıb və səsucaldıcılar vasitəsilə yayımlar həyata keçiriblər. Seul bu addımları Şimali Koreya hərbçilərinin sərhədi keçməsi ilə əsaslandırıb.

Şimali Koreya rəsmisi bildirib ki, Pxenyan sərhəd bölgəsində əlavə taktiki zərbə vasitələrinin yerləşdirilməsi imkanını nəzərdən keçirir. Bu addım mümkün təhlükələrə qarşı tədbir kimi təqdim olunur.

Sərhəddə gərginlik dərinləşir

Məlumatlara görə, Şimali Koreya son illərdə Cənubi Koreya ilə sərhəd boyunca minalar, tikanlı məftillər və tank əleyhinə maneələr də daxil olmaqla, müdafiə qurğularını gücləndirib.

Cənubi Koreya tərəfi isə Şimali Koreyanı sərhəd bölgəsində təhlükəli addımlar atmaqda ittiham edir. Tərəflər arasında qarşılıqlı ittihamlar Koreya yarımadasında hərbi gərginliyin davam etdiyini göstərir.

Kim Çen Inın səhhəti ilə bağlı iddialar

Kim Yo Conqun bəyanatı Şimali Koreya lideri Kim Çen Inın səhhəti və hakimiyyətin gələcəyi ilə bağlı yayılan iddiaların diqqət çəkdiyi bir vaxta təsadüf edib.

Bununla belə, Kim Çen Inın öldüyü və hakimiyyətin bacısına keçdiyi barədə yayılan məlumatlar rəsmi şəkildə təsdiqlənməyib. Onun bacısının bəyanatı da bu iddiaları təsdiqləyən sübut hesab edilə bilməz.

Müəllif: İlkin Məmmədkərimov

Telegramda izləyin