İldırım çaxarkən bu yerlərdə dayanmayın - TƏHLÜKƏ QAYDALARI

İldırım vurması insan həyatı üçün ciddi təhlükə yarada, ağır xəsarətlərə və hətta ölümə səbəb ola bilər. Xüsusilə, ildırımlı hava zamanı açıq ərazilərdə qalmaq, ağacların altında daldalanmaq və su hövzələrinin yaxınlığında olmaq təhlükəni artırır. Belə hadisələr zamanı riskləri azaltmaq üçün təhlükənin hansı şəraitdə daha yüksək olduğunu bilmək və təhlükəsizlik qaydalarına əməl etmək vacibdir.

Bəs, ildırım vurması hansı hallarda daha ağır nəticələrə səbəb olur, açıq ərazilərdə və su hövzələrinin yaxınlığında olmaq hansı riskləri yaradır və ildırımlı hava zamanı insan həyatı üçün təhlükəni azaltmaq üçün hansı qaydalara əməl edilməlidir?
Mövzu ilə bağlı Sonxeber.az-a açıqlama verən təhlükəsizlik məsələləri üzrə ekspert Samir Nəbiyev bildirib ki, ildırım çaxarkən ən vacib təhlükəsizlik tədbiri açıq ərazidən uzaqlaşaraq sığınacağa keçməkdir:

"Göy gurultusunun eşidilməsi yağış yağmasa belə, ildırım təhlükəsinin mövcud olduğunu göstərir. Bu halda açıq havada görülən işlər dayandırılmalı, əsaslı və tam qapalı binaya, yaxud pəncərələri bağlı, metal damlı avtomobilə sığınmaq lazımdır. Çadırlar və yanları açıq talvarlar isə ildırımdan qorunmaq üçün etibarlı yer hesab edilmir. Tək ağacın altında dayanmaq, yüksəkliklərdə qalmaq, elektrik dirəklərinə, metal hasarlara və su hövzələrinə yaxınlaşmaq təhlükəlidir. Yaxınlıqda sığınacaq olmadıqda, sadalanan yerlərdən uzaqlaşaraq qapalı və təhlükəsiz məkan tapmağa çalışmaq lazımdır. Bu zaman yerə uzanmaq da düzgün deyil, çünki ildırımın yaratdığı elektrik cərəyanı torpaq səthi boyunca yayıla bilər. Açıq ərazidə heç bir bədən vəziyyəti tam təhlükəsizliyə zəmanət vermir".

Ekspert bildirib ki, evdə olarkən də müəyyən ehtiyat tədbirlərinə əməl edilməlidir:

"Pəncərələrdən kənarda dayanmaq, duş qəbul etməmək, krandan istifadəni məhdudlaşdırmaq və elektrik şəbəkəsinə qoşulan cihazlardan uzaq durmaq tövsiyə olunur. Şarj cihazına qoşulmayan mobil telefondan istifadə mümkündür, lakin simli telefonla danışmaqdan çəkinmək lazımdır. Yağışın kəsilməsi ildırım təhlükəsinin aradan qalxdığı anlamına gəlmir. Sonuncu göy gurultusu eşidildikdən sonra ən azı 30 dəqiqə təhlükəsiz sığınacaqda qalmaq vacibdir. Xüsusilə çobanlar və açıq ərazidə çalışan şəxslər hava proqnozunu əvvəlcədən izləməli, ildırım təhlükəsi gözlənildikdə işlərini təxirə salmalı və ya vaxtında təhlükəsiz yerə keçməlidirlər. İldırım vurmuş şəxsə yardım göstərmək təhlükəsizdir, çünki onun bədənində elektrik yükü qalmır. Bununla belə, kömək edən şəxs öz təhlükəsizliyini də qorumalı və dərhal 112-yə zəng etməlidir. Zərərçəkən huşsuz vəziyyətdədirsə və normal nəfəs almırsa, təcili yardım dispetçerinin göstərişlərinə əsasən ürək-ağciyər reanimasiyasına başlanmalıdır".

Röyalə Xəyal

Telegramda izləyin