Azərbaycan-Hindistan münasibətlərində yeni mərhələ başlaya bilər

Hindistanın Azərbaycanla daha geniş əməkdaşlıq imkanları axtarması müsbət addımdır. Azərbaycan regionun aparıcı ölkələrindən biri kimi geniş iqtisadi, nəqliyyat və enerji imkanlarına malikdir. Bu baxımdan, iki ölkə arasında əlaqələrin inkişaf etdirilməsi qarşılıqlı maraqlara xidmət edə bilər.

Bu fikirləri Sonxeber.az-a açıqlamasında siyasi şərhçi Aydın Quliyev bildirib.

Azərbaycan Hindistan üçün strateji əhəmiyyət daşıyan Şimal-Cənub nəqliyyat dəhlizinin mühüm halqalarından biridir. Ölkəmizin tranzit və nəqliyyat imkanları, eləcə də enerji potensialı Hindistan üçün yeni perspektivlər yaradır. Bu imkanlardan səmərəli istifadə edilməsi iqtisadi əməkdaşlığın genişlənməsinə və qarşılıqlı əlaqələrin möhkəmlənməsinə töhfə verə bilər.

Azərbaycan xarici siyasətində müxtəlif ölkələrlə əməkdaşlığa açıq yanaşır və bu əlaqələri üçüncü dövlətlərə qarşı vasitəyə çevirmir. Ölkəmiz Pakistanla dostluq və qardaşlıq münasibətlərinə malik olsa da, Hindistanla əməkdaşlığın inkişafı üçün də imkanları nəzərə alır. Bu yanaşma Azərbaycanın beynəlxalq münasibətlərdə qarşılıqlı hörmətə və əməkdaşlığa əsaslanan siyasətinin göstəricisidir.

Azərbaycanın beynəlxalq hüquq normalarına və dövlətlərin suverenliyi prinsipinə verdiyi önəm də xarici siyasətinin əsas istiqamətlərindəndir. Ölkəmiz müxtəlif məsələlərə münasibətdə bu prinsipləri rəhbər tutur. Azərbaycan-Hindistan əlaqələrinin gələcəkdə daha da inkişaf etdirilməsi üçün iqtisadiyyat, nəqliyyat, enerji və digər sahələrdə mövcud imkanlardan istifadə etmək vacibdir.

Telegramda izləyin