Evi xoş qoxulu saxlamaq üçün SADƏ ÜSUL - Cəmi bir neçə saniyə çəkir

Evdə xoş ətir yaratmaq üçün bahalı hava təravətləndiriciləri və aromatik çubuqlar almağa ehtiyac yoxdur. Sadə üsulla ev şəraitində hazırlanan ətirli duzdan istifadə etməklə otaqlara bir neçə gün davam edən xoş qoxu vermək mümkündür.
Ölkə.az yerli mətbuata istinadən xəbər verir ki, bu barədə "Kertvar" nəşri yazıb.

Bunun üçün iri dənəli adi mətbəx duzu və ya ətirsiz vanna duzu, həmçinin istənilən efir yağı kifayətdir. Duz şüşə qaba, məsələn, bankaya və ya stəkana tökülür və qabın təxminən üçdə ikisi doldurulur. Daha sonra üzərinə 5-10 damcı efir yağı əlavə edilir.

Qarışığın daha yaxşı alınması üçün duzu qaşıqla qarışdırmaq və ya qabı yüngülcə çalxalamaq lazımdır. Beləliklə, yağ duz kristallarının arasında bərabər şəkildə yayılır və tədricən buxarlanaraq otağa ətir verir.

Hazırlanan duz birbaşa günəş şüaları düşməyən, uşaqların və ev heyvanlarının çata bilmədiyi yerdə saxlanmalıdır. Ətir zəiflədikdə duzu yenidən qarışdırmaq və ya bir neçə damcı efir yağı əlavə etmək olar. Duzdan bir neçə həftə ərzində təkrar istifadə etmək mümkündür. Lakin rəngi dəyişərsə və ya topalaşarsa, onu yenisi ilə əvəz etmək məsləhətdir.

Ev üçün ən çox seçilən qoxular arasında lavanda, limon, portağal, nanə, limonotu və evkalipt var. Sitrus və nanə qoxuları mətbəx və dəhliz üçün, lavanda isə yataq otağı üçün daha uyğun hesab olunur. Dekorativ görünüş üçün qabın üzərinə qurudulmuş lavanda, sitrus qabığı və ya darçın çubuqları da əlavə edilə bilər.

Qeyd olunur ki, duz burada əsasən efir yağını özündə saxlayan daşıyıcı rolunu oynayır. Böyük duz kristalları yağın tədricən və nisbətən bərabər şəkildə buxarlanmasına şərait yaradır. Bununla belə, duzun otaqdakı xoşagəlməz qoxuları və ya rütubəti əhəmiyyətli dərəcədə aradan qaldırdığı fikri doğru deyil. Efir yağları da pis qoxunu yox etmir, əsasən onu başqa qoxu ilə ört-basdır edir.

Telegramda izləyin