İspaniyada dəhşətli qatar qəzası: Ölənlər arasında sabiq nazir də var - Video

İspaniyanın Toledo əyalətində iki sərnişin qatarının toqquşması nəticəsində ölənlərin sayı artıb.

Oxu.Az "El Correo" nəşrinə istinadən xəbər verir ki, bu barədə Kastiliya-La-Mança muxtar icmasının rəhbəri Emiliano Qarsia-Paxe məlumat verib.

"Son məlumatlara görə, ölənlərin sayı 68 nəfərə çatıb", - deyə o, jurnalistlərə bildirib.

İspaniyanın keçmiş məşğulluq və sosial müdafiə naziri Fatima Banyes də Toledoda baş verən dəmiryolu qəzasında həlak olub.

15:39

İspaniyanın Toledo əyalətində (Kastiliya-La-Mança muxtar regionu) iki sərnişin qatarının toqquşması ağır nəticələrə səbəb olub.

Qəzada ölənlərin sayı 50-yə çatıb, 179 nəfər yaralı var.

Oxu.Az-ın məlumatına görə, hadisənin təfərrüatı "Antena 3" televiziya kanalında yayımlanıb.

Qeyd edək ki, oktyabrın 28-də səhər saatlarında Urda qəsəbəsi ərazisində iki qatarın iştirakı ilə insident qeydə alınıb. Hadisə zamanı qatarlardan birinə aid olan iki vaqon relsdən çıxıb.

14:51

İspaniya hökuməti ölkənin Toledo əyalətində (Kastiliya-La-Mança muxtar icması) iki sərnişin qatarının toqquşmasının insan səhvi səbəbindən baş verməsini ehtimal edir.

Oxu.Az xəbər verir ki, bu barədə "El PaÍs" qəzeti mənbələrə istinadən məlumat yayıb.

Mənbənin sözlərinə görə, təhlükəsizlik sistemində yaranmış nasazlıqla əlaqədar olaraq "Adif" şirkətinin (dəmiryolu şəbəkəsinin operatoru - red.) operatorunun yol verdiyi insan səhvi qəzanın mümkün səbəbi ola bilər.

Nəşr vurğulayır ki, avtomatlaşdırılmış sistemdəki nasazlıq səbəbindən hərəkət dayandırılıb. Lakin hərəkətin bərpasına imkan verə biləcək əl idarəetməsinə keçmək cəhdi isə sonda fəlakətə gətirib çıxarıb.

Başqa mənbələr isə iddia edirlər ki, təhlükəsizlik sisteminin təmiri ilə məşğul olan işçi qatarların təhlükəli şəkildə yaxınlaşması barədə xəbərdarlıq etməyib.

Qeyd edək ki, qatarların toqquşması nəticəsində ən azı 46 nəfər həyatını itirib.

13:58

İspaniyada iki sərnişin qatarının toqquşması nəticəsində ən azı 46 nəfər həyatını itirib.

Oxu.Az xəbər verir ki, bu barədə ABC nəşri məlumat yayıb.

Qəza yerli vaxtla saat 09:00-da (Bakı vaxtı ilə saat 12:00) Madrid-Əndəlüs yüksəksürətli magistralında, Urda dəmiryol stansiyasının yaxınlığında yerləşən Los-Yebenes və Urda yaşayış məntəqələri arasındakı ərazidə qeydə alınıb.

Qatarlardan birinin iki vaqonu relsdən çıxaraq aşıb və dəmir yolu xəttindən kənara düşüb. Hadisə şahidləri çox sayda insanın xəsarət aldığını bildiriblər. Əraziyə tibb işçiləri cəlb olunublar.

Hazırda hadisə yerində təcili yardım xidmətləri fəaliyyət göstərir: xilasedicilər sərnişinləri zədələnmiş vaqonlardan çıxarır, həkimlər isə yaralılara ilkin tibbi yardım göstərirlər. Şahidlərin sözlərinə görə, xəsarət alanlar çoxdur, lakin onların dəqiq rəsmi sayı hələlik bəlli deyil.

"Renfe" şirkətindən verilən məlumata əsasən, Madrid, Syudad-Real və Əndəlüs istiqamətlərində qatarların hərəkəti müvəqqəti olaraq dayandırılıb. Dəmiryol operatorları sərnişinlər üçün əvəzedici marşrutlar təşkil edirlər.

Hakimiyyət orqanları qəzanın başvermə səbəblərini araşdırmağa başlayıb. Mütəxəssislər dəmir yolu xətlərinin vəziyyətini, siqnalizasiya sistemlərinin göstəricilərini və qatarların telemetriyasını yoxlayırlar.

Faciənin texniki nasazlıq və ya dispetçer xətası üzündən baş verməsi istisna edilmir.

Ölkənin Baş naziri Pedro Sançes həlak olanların yaxınlarına başsağlığı verib və hadisənin bütün detallarının dərindən araşdırılacağına söz verib. Günahkarların müəyyən edilməsi məqsədilə prokurorluq tərəfindən artıq cinayət işi açılıb.

Telegramda izləyin