Qripdən qorunmaq istəyənlər bunu bilməlidir: Peyvənd nə vaxt vurulmalıdır?

Mövsümi qripə qarşı peyvənd xəstəliyin qarşısının alınmasında və yoluxma baş verdiyi halda onun ağır keçməsi riskinin azaldılmasında mühüm rol oynayır. Bununla belə, peyvənd olunan şəxsin də qripə yoluxması mümkündür və qorunma səviyyəsi virusun ştammlarından, peyvəndin həmin mövsümdəki effektivliyindən və insanın sağlamlıq vəziyyətindən asılı olaraq dəyişə bilər. Xüsusilə uşaqlar, yaşlılar və xroniki xəstəlikləri olan şəxslər üçün qripin yarada biləcəyi fəsadlar nəzərə alınaraq peyvəndin əhəmiyyəti və onun vurulması üçün uyğun vaxt məsələsi aktuallıq daşıyır.

Bəs, mövsümi qrip peyvəndi yoluxma və xəstəliyin ağır keçməsi riskini nə dərəcədə azaldır? Peyvənd olunduqdan sonra qripə yoluxmaq mümkündürmü, risk qrupuna daxil olan şəxslər nə vaxt peyvənd olunmalıdırlar və qorunmanın effektivliyi hansı amillərdən asılıdır?
Mövzu ilə bağlı Sonxeber.az-a açıqlama verən tibb eksperti Şahvələd Məmmədov bildirib ki, mövsümi qripə qarşı peyvənd dövlət proqramı çərçivəsində həyata keçirilir.

"Peyvəndlər ayrı-ayrı dövlət tibb müəssisələrinə, poliklinikalara və ambulatoriyalara təqdim olunub. Peyvəndləmə əsasən oktyabrın ortalarından noyabrın sonunadək nəzərdə tutulur. Mövsümi qripə, o cümlədən A və B tipli qrip viruslarına qarşı peyvənd olunmaq vacibdir. Xüsusilə 5 yaşadək uşaqlar, 65 yaşdan yuxarı şəxslər və xroniki xəstəlikləri olan insanlar risk qrupuna daxildirlər. Bu kateqoriyadan olan şəxslərin qripə qarşı peyvənd olunması xəstəliyin ağır keçməsinin və mümkün fəsadların qarşısının alınması baxımından əhəmiyyətlidir".

Ekspert bildirib ki, digər infeksiyalara qarşı uşaqların yaşlarına uyğun olaraq müntəzəm peyvənd olunması vacibdir:

"Məsələn, göyöskürək və difteriyaya qarşı peyvəndlər uşaqların peyvənd təqviminə uyğun aparılır. Lakin mövsümi qripə qarşı peyvənd ayrıca əhəmiyyət daşıyır və xüsusilə risk qrupları üçün tövsiyə olunur. Qrip əleyhinə peyvənd qoruyucu xarakter daşıyır. Bəzən belə bir sual yaranır: peyvənd olunan insan qripə yoluxa bilərmi? Bəli, peyvənddən sonra da yoluxma mümkündür. Bununla belə, peyvənd xəstəliyin ağır keçməsi və ciddi fəsadların yaranması riskini azaltmağa kömək edir. Xüsusilə xroniki xəstəlikləri olan şəxslər qripə yoluxduqda daha ciddi təhlükələrlə üzləşə bilərlər. Qrip bəzi hallarda meningit və ensefalit kimi ağırlaşmalara səbəb ola, hətta ölümlə nəticələnə bilər. Buna görə də risk qrupuna daxil olan şəxslərin mövsümi qripə qarşı peyvənd olunması mühüm profilaktik tədbirdir".

Röyalə Xəyal

Telegramda izləyin