Gecələr ayaqlarda qıcolmaların təhlükəli səbəbləri

Gecə yuxu zamanı ayaq əzələlərində qəfil və ağrılı qıcolmalar bir çox insanda müşahidə olunur.

Milli.Az xəbər verir ki, bu hal bəzən sadə səbəblərlə bağlı olsa da, tez-tez təkrarlanması müəyyən sağlamlıq problemlərinin əlaməti ola bilər.

Ayaq qıcolmalarına susuz qalmaq, gün ərzində həddindən artıq fiziki yüklənmə, uzun müddət ayaqüstə qalmaq və bəzi mineral çatışmazlıqları səbəb ola bilər. Xüsusilə maqnezium, kalium və kalsium səviyyəsində dəyişikliklər əzələ spazmlarının yaranmasına təsir göstərə bilər.

Bəzi hallarda isə gecə qıcolmaları qan dövranı problemləri, sinir sisteminə təsir edən xəstəliklər, böyrək funksiyasının pozulması və ya müəyyən dərmanların istifadəsi ilə əlaqəli ola bilər.

Qıcolmaların mütəmadi şəkildə təkrarlanması, güclü ağrı ilə müşayiət olunması, ayaqlarda şişkinlik, keyimə və ya zəiflik yaranması diqqətdən kənarda qalmamalıdır. Belə hallarda səbəbin müəyyənləşdirilməsi üçün həkimə müraciət etmək tövsiyə olunur.

Qıcolma zamanı əzələni yüngül şəkildə dartmaq və masaj etmək, həmçinin kifayət qədər maye qəbul etmək narahatlığın azalmasına kömək edə bilər. Müalicə üçün isə səbəb müəyyən edilmədən vitamin və mineral preparatlarını özbaşına qəbul etmək məsləhət görülmür.

Telegramda izləyin