Kərə yağı alarkən aldanmayın: Keyfiyyətli məhsulu necə seçmək olar? - QİDA EKSPERTİNDƏN AÇIQLAMA

Kərə yağı gündəlik qidalanmada geniş istifadə olunan məhsullardan biridir. Lakin mağazalarda müxtəlif marka və qiymətlərlə satışa çıxarılan məhsulların hamısı eyni keyfiyyətə malik deyil. Bəzi hallarda təbii kərə yağı adı altında fərqli tərkibli məhsulların təqdim edilməsi istehlakçıların düzgün seçim etməsini çətinləşdirir.

Bəs kərə yağı alarkən onun keyfiyyətini necə müəyyən etmək olar? Məhsulun qablaşdırmasında hansı məlumatlara diqqət yetirilməlidir və təbii kərə yağını digər yağ qarışıqlarından necə fərqləndirmək mümkündür?

Mövzu ilə bağlı qida eksperti Səbuhi Məmmədov Sonxeber.az-a açıqlamasında bildirdi ki, kərə yağı alarkən istehlakçılar ilk növbədə məhsulun tərkibinə, yağlılıq faizinə, istehsal və son istifadə tarixinə diqqət yetirməlidirlər. Onun sözlərinə görə, təbii kərə yağının tərkibində əsasən süd yağı olmalıdır: "Məhsulun tərkibində bitki yağlarının, palma yağının və digər yağ əvəzedicilərinin olması onun klassik kərə yağı olmadığını göstərir. Kərə yağının keyfiyyətini yalnız rənginə və qoxusuna əsasən müəyyənləşdirmək düzgün deyil.

Eyni zamanda, bazarda həddindən artıq ucuz qiymətə təklif olunan məhsullara qarşı diqqətli olmaq lazımdır. İstehlakçılar məhsulun qablaşdırmasındakı məlumatları oxumalı, istehsalçıya və saxlanma şəraitinə fikir verməli, alış-verişi etibarlı satış məntəqələrindən etməlidirlər".

Müəllif: İlkin Məmmədkərimov

Telegramda izləyin