Xankəndidə qələbə təntənəsinin nümayişi

Zəfər Gününün altıncı ildönümü ərəfəsində Prezident İlham Əliyevin Qarabağ və Şərqi Zəngəzura səfəri bir daha göstərir ki, Azərbaycan üçün 8 Noyabrın mahiyyəti azad edilmiş torpaqlarda hər gün yenidən təsdiqlənir. Bir vaxtlar düşmənin viran qoyduğu kəndlərdə evlərin işıqları yanır, məktəblərin qapıları açılır, yeni müəssisələr fəaliyyətə başlayır, illərlə doğma yurd həsrəti ilə yaşayan insanlar öz evlərinin açarlarını alırlar. Prezident İlham Əliyevin Zəfər bayramını yenə Qarabağda qarşılaması bu prosesin həm siyasi, həm də mənəvi rəmzidir. Çünki bu torpaqlarda görülən hər işin arxasında xalqımızın qırılmaz iradəsi, dövlətin qətiyyəti və tarixi ədalətin bərpası dayanır.

Noyabrın 6-da Prezident İlham Əliyev və birinci xanım Mehriban Əliyevanın Cəbrayıl və Zəngilan rayonlarına səfəri çərçivəsində bir sıra mühüm açılışlar həyata keçirilib. Cəbrayıl rayonunun Soltanlı kəndinin, Zəngilan rayonunun Cahangirbəyli kəndinin birinci mərhələlərinin açılışı, Zəngilan Şəhər Təhsil Kompleksinin və istehsal müəssisəsinin istifadəyə verilməsi səfərin mühüm nəticələrindəndir. Ən təsirli məqamlardan biri isə uzun illər yurd həsrəti çəkmiş sakinlərə yeni evlərinin açarlarının təqdim olunmasıdır. İki kəndə ümumilikdə, 700-ə yaxın ailənin qayıdışının nəzərdə tutulması Böyük Qayıdışın ardıcıl və genişmiqyaslı Dövlət Proqramı kimi həyata keçirildiyini göstərir.

Noyabrın 7-də Prezidentin Qarabağ səfəri davam edib. Ağdamda sənaye müəssisələrinin açılışı, Rayon Mərkəzi Xəstəxanasının tikintisi ilə tanışlıq, Xankəndidə stadionun istifadəyə verilməsi, Qarabağ Universitetinin kitabxanası və İnnovasiya Mərkəzinin binalarının təməlinin qoyulması, Universitet klinikasının təcili tibbi yardım şöbəsinin açılışı, Şuşa Dövlət Peşə Təhsil Mərkəzinin istifadəyə verilməsi bu səfərin əhatə dairəsini daha da genişləndirib. Bu ardıcıllıq təsadüfi deyil: Qarabağın gələcəyi yaşayış evləri ilə yanaşı, təhsil, səhiyyə, idman, sənaye, peşə hazırlığı və müasir texnologiyalar üzərində qurulur.

Xüsusilə Qarabağ Universiteti ilə bağlı yeni layihələr diqqətəlayiqdir. Kitabxana və İnnovasiya Mərkəzinin təməlinin qoyulması, Universitet klinikasının fəaliyyətə başlaması azad edilmiş ərazilərdə insan kapitalının inkişafına verilən önəmi göstərir. Bu torpaqlara qayıdan gənclər yalnız doğma yurda bağlanmamalı, həm də müasir təhsil almaq, yeni texnologiyalara yiyələnmək və öz potensiallarını burada reallaşdırmaq imkanına sahib olmalıdırlar. Qarabağ artıq təkcə tarixi yaddaşımızın və Zəfərimizin məkanı deyil, elmin, təhsilin və innovasiyanın da yeni ünvanına çevrilir.

Ağdamda sənaye müəssisələrinin açılması isə Böyük Qayıdışın iqtisadi əsaslarının yaradılması baxımından xüsusi əhəmiyyət daşıyır. İnsanların doğma torpaqlarında davamlı məskunlaşması üçün onlara yalnız ev deyil, iş və qazanc imkanları da lazımdır. Sənaye parkları, istehsal müəssisələri, xidmət sahələri, nəqliyyat və enerji infrastrukturu bu məqsədə xidmət edir. Ağdamda istehsalın genişlənməsi, Xankəndidə təhsil və idman infrastrukturunun inkişafı, Şuşada peşə təhsilinə yeni imkanların yaradılması Qarabağın müxtəlif şəhər və rayonlarının öz potensialına uyğun inkişaf etdirildiyini göstərir.

Bu səfərlərin mühüm cəhətlərindən biri Prezident İlham Əliyevin quruculuq prosesinə bilavasitə nəzarət etməsidir. Dövlət başçısının mütəmadi olaraq azad edilmiş ərazilərə gəlməsi, layihələrin gedişi ilə yerində tanış olması, açılış və təməlqoyma mərasimlərində iştirakı, müvafiq tapşırıqlar verməsi Qarabağ və Şərqi Zəngəzurun bərpasının dövlət siyasətinin prioritet istiqaməti olduğunu nümayiş etdirir. Rəsmi məlumatlara əsasən, son beş ildə Prezident azad edilmiş ərazilərdə 500-dən çox tədbirdə iştirak edib, müxtəlif sahələr üzrə yüzlərlə layihənin təməlini qoyub. Bu göstəricilər dövlət başçısının həmin tarixi missiyaya verdiyi siyasi əhəmiyyəti və prosesin davamlı xarakterini ifadə edir.
Zəfər Gününü Qarabağda qarşılamaq Prezident İlham Əliyev üçün artıq mənəvi-siyasi ənənəyə çevrilib. Bunun mühüm mesajı var: Azərbaycan öz qələbəsini yalnız xatırlamır, onu hər il yeni nəticələrlə zənginləşdirir. Bir vaxtlar azadlığı uğrunda mübarizə apardığımız torpaqlarda indi məktəblər açılır, universitet binalarının təməli qoyulur, sənaye müəssisələri işə düşür, stadionlar istifadəyə verilir, ailələr yeni evlərinə köçür. Bu, Zəfərin gündəlik həyata çevrilməsidir.

Azərbaycan Prezidenti İlham Əliyevin 8 Noyabr - Zəfər Günü münasibətilə Xankəndidən Azərbaycan xalqına ünvanladığı müraciət ölkəmizin keçdiyi tarixi yolun, əldə etdiyi nailiyyətlərin və qarşıda duran vəzifələrin bir daha dəyərləndirilməsi baxımından mühüm əhəmiyyət daşıyır. Dövlət başçısının müraciətində Qarabağın azadlığı, Azərbaycanın suverenliyinin tam bərpası, Böyük Qayıdış və gələcək inkişaf məsələlərinin xüsusi vurğulanması hər birimizdə qürur hissi doğurur. Prezident İlham Əliyevin Zəfər Günü müraciətini Xankəndidən səsləndirməsi, xüsusilə "Qarabağ Azərbaycandır və nida" bəyanatının tarixi məzmununa diqqət çəkməsi böyük rəmzi məna daşıyır. 2023-cü ilin sentyabrında Azərbaycanın suverenliyinin tam bərpası ilə Qarabağda yeni bir mərhələnin əsası qoyuldu. Bu gün həmin torpaqlarda dövlət idarəçiliyinin, sosial həyatın, elmin, təhsilin və iqtisadi fəaliyyətin bərpası gələcəyə yönəlmiş ardıcıl siyasətin nəticəsidir.

Prezidentin müraciətində xüsusi yer tutan Böyük Qayıdış proqramı da bu baxımdan böyük əhəmiyyət kəsb edir. İnsanların doğma yurdlarına qayıtması ilə Qarabağda həyat yenidən canlanır. Lakin bu qayıdışın davamlı olması üçün sağlam ətraf mühitin, təmiz su ehtiyatlarının, münbit torpaqların və yaşıl ekosistemlərin qorunması vacibdir. Müasir yaşayış məntəqələrinin salınması ilə yanaşı, yaşıllıq zolaqlarının yaradılması, yerli bitki növlərindən istifadə, meşə və otlaq sahələrinin bərpası da diqqət mərkəzində olmalıdır. Zəfər Muzeyinin Xankəndidə yaradılması ilə bağlı qərarı da milli yaddaşın qorunması baxımından mühüm hadisə hesab edilməlidir. Tarixi həqiqətlərin gələcək nəsillərə çatdırılması, şəhidlərimizin qəhrəmanlığının yaşadılması hər birimizin mənəvi borcudur. Eyni zamanda, Qarabağda qurulan yeni həyatın, bərpa edilən təbiətin və elmi tədqiqatların nəticələrinin də gələcək nəsillərə ötürülməsi vacibdir. Azərbaycan xalqının Vətən müharibəsində nümayiş etdirdiyi birlik və həmrəylik bu gün quruculuq mərhələsində də davam etməlidir. Azərbaycan Qarabağı azad etməklə öz tarixi haqqını bərpa etdi, indi isə onu yenidən qurmaqla Zəfərin əbədiliyini təmin edir. Bu gün Qarabağda yüksələn hər bina, açılan hər məktəb, işə düşən hər müəssisə və öz evinə qayıdan hər ailə bir həqiqəti dünyaya nümayiş etdirir: bu torpaqlarda həyat yenidən başlayıb və bu başlanğıcın adı Zəfərdir!

Təranə Tağıyeva - BDU, Beynəlxalq munasibətlər və iqtisadiyyat fakultəsinin dosenti, Tarix üzrə fəlsəfə doktoru

Telegramda izləyin