"Pfizer" vaksini bölgələrdə də vurulacaq? - AÇIQLAMA

Xəbər verdiyimiz kimi, ötən gün, cari epidemioloji vəziyyəti nəzərə alaraq, Səhiyyə Nazirliyinin Elmi Tibbi Şurası və TƏBİB-in Elmi Komitəsi tərəfindən 16 yaşdan yuxarı yeniyetmələrin "Pfizer" vaksinləri ilə peyvənd olunması qərarı qəbul edilib. Buna baxmayaraq, bölgələrdə hələ də "Sinovac", "Coronavac" vaksinləri əhaliyə tətbiq edilir. Bəs bölgələrdə yaşayan yeniyetmələr "Pfizer" vaksinini vurdurmaq üçün mütləq Bakıya gəlməlidirlərmi?

Məsələ ilə bağlı Sonxeber.az saytına açıqlama verən infeksionist Nicat Əzimli bildirib ki, "Pfizer" vaksini daha effektivdir:

"Mən Operativ Qərargahın üzvü olmadığım üçün bu məsələyə tam dəqiq cavab verə bilmərəm, lakin öz fikirlərimə əsaslanaraq, onu deyə bilərəm ki, "Pfizer" hazırda dünyada ən effektiv vaksindir. "Sinovac"ın zəif olduğunu biz görürük: xəstəliyin ağırlaşmasından hər kəsi qoruya bilmir. Böyük bir əhali qrupuna öz müsbət təsirini göstərsə də, xüsusilə "Delta" variantına yoluxanlarda ağırlaşmalar çox müşahidə olunur, "Pfizer" isə bu cəhətdən üstündür. "Pfizer" daha effektiv olmaqla yanaşı, dünya ölkələri tərəfindən də tanınılır. Bir məsələ var ki, "Pfizer" vaksini bölgələrdə yoxdur və problemin həll olunması yaxşı olardı. Ümidvaram ki, gələcəkdə bu proses bölgələrdə həyata keçiriləcək".

Rafi Müslümov

Telegramda izləyin