Uşaqlar məktəbə 5 yaşlarında gedəcəklər? - AÇIQLAMA

Təhsil naziri Emin Əmrullayev uşaqların 5 yaşdan məktəbə getmələrini təklif edib. Bu isə valideynlərin narazılığına səbəb olub.

Məsələ ilə bağlı Sonxeber.az-a Təhsil eksperti Kamran Əsədov açıqlama verib.

O, məktəbə hazırlığı təhsilin bir pilləsi olaraq qəbul etmədiklərini, 12 illik təhsilə keçmək üçün hazırlığın icbari olacağını bildirib:

"Qeyd edim ki, 2013-cü ildə ölkə Prezidenti cənab İlham Əliyev tərəfindən qəbul edilmiş təhsil inkişafı üzrə dövlət staregiyasına görə, Azərbaycan 12 illik təhsilə keçməlidir.

12 illik təhsilə keçid deyəndə hər kəs fikirləşirdi ki, 1 il əlavə oxumaq lazım olacaq. Əvəzində isə hörmətli təhsil naziri vəziyyətin həm çıxış yolu kimi, həm də öyrənmənin daha erkən yaşa çəkilməsi üçün uşaqları kiçik yaşlardan təhsilə cəlb etməliyi təklif edib.

Bu, çox doğru yanaşmadır. Təhsili öndə olan dünya reytinqli ölkələrdə təhsilə cəlb edilmə daha erkən yaşlarda başlayır.

Bu, ölkənin iqdisadi inkişafı üçün çox vacib amildir. Digər tərəfdən, uşaqları daha az yaşlarda məktəbə cəlb edilən ölkələrdə vətəndaşlar daha xoşbəxt, uğurlu və karyerada rahat irəlləyiş əldə edə bilirlər.

Əslində Azərbaycanda 2016-cı ildən təhsilə 5 yaşdan cəlb edilmə tətbiq edilib. O ildən ölkədə məktəbə hazırlıq qrupları var və şagirdlər könüllü olaraq kiçik yaşdan məktəbə cəlb edilirlər.

Ölkənin 2900 məktəbində 90 min şagird 5 yaşından məktəbə hazırlıq qruplarına cəlb olunur.

Baxırıq ki, məktəbə hazırlıq qruplarına gedən uşaqla getməyən uşaqların tədris göstəricisi kifayət qədər fərqlidir. 5 yaşdan gedənlər daha uğurludurlar, mənimsəmələri daha yaxşıdır.

Hesab edirəm ki, uşaqlar 5 yaşda məktəblərə cəlb edilsə, bu, orta məktəbdə müəllimlərin sayının artmasına, iş yerlərinin olmasına, ölkə iqdisadiyyatının daha da inkişaf etməsinə gətirib çıxaracaq.

Yaponiyada, Cənubi Koreyada, Sinqapurda, Avropa ölkələrində bu model artıq tətbiq edilir.

Reallıq ondan ibarətdir ki, valideynlər narahatdırlar. Amma həmin valideyinlər övladlarını 2-3 yaşdan etibarən uşaq bağçalarına qoyurlar. Bu gün monitorinq aparsaq görərik ki, 3 ya 4 yaşda uşaqların bəziləri valideynlərinin təkidi ilə oxumağı, yazmağı, şeir əzbərləməyi bilirlər.

Sadəcə nazirimizin "uşaqları erkən yaşdan məktəbə cəlb etmək lazımdır" fikri ibtidai sinif proqramlarının yumşaldılmasına hesablanıb. Bu gün hər birimiz ibtidai siniflərdə tədris proqramlarının ağırlığını bilirik və narahatıq. Amma biz artıq birinci sinfin işini daha erkən yaşda uşaqlara çatdırmalı olacağıq.

Bu gün icbari təhsil 6 yaşdandır, amma biz 5 yaşdan etibarən bunu uşaqlara aşılasaq, artıq uşaqlar o yaşda oxumağı, yazmağı biləcəklər, ibtidai sinif proqramı isə sadələşəcək.

Bu gün biz məktəbə hazırlığı təhsilin bir pilləsi olaraq qəbul etmirik. 12 illiyə keçmək istəyiriksə, artıq məktəbə hazırlıq icbari olmalıdır.

Öyrənmənin daha erkən yaşlara çəkilməsində heç bir problem yoxdur. Onsuz da bu gün uşaqlar hazırlıqlara gedirlər. Valideynlərin də əmək fəaliyyəti ilə məşğul olmaq üçün kifayət qədər vaxtları olacaq".

ZAİRA AKİFQIZI

Telegramda izləyin