Bu cümlə qadınları depressiyaya sala bilər

Məni narahat edən bir mövzudan yazmaq istəyirəm.

İstər televizor, istər sosial media, istərsə də gündəlik həyatımızda ətrafda olan insanların daim qadınlara aşılamaq istədiyi bir fikir var: "Sən güclüsən, sən bacararsan!"

Əvvəlcə mənə normal gəlirdi. Düşünürdüm ki, bunu qadınları həvəsləndirmək, onlara dəstək olmaq üçün edirlər, lakin bir müddətdən sonra məsələyə başqa tərəfdən baxmağa başladım.

Yuxarıda qeyd etdiyim şüarlar qadınlara onu diktə edir ki, sən həm iş qadını olub işləməlisən, həm övladlarının anası olub onların hər cür tələbatını yerinə yetirməlisən, həm də ev işlərinin öhdəsindən gəlməlisən. Sanki bir növ buna məcbursan, dövr bunu tələb edir. Halbuki bu fikirlər çox yalnışdır.

Hərtərəfli olmayan, sadaladıqlarımdan hər hansı birinə sahib olmayan qadının hamısına sahib olan qadınlara necə həsədlə baxdığının şahidiyəm.

Çox uzağa getmədən, sosial şəbəkələrdə güclü qadınlar haqqında yazılan rəylərdə belə qadınları görə bilərsiniz. Düşünmürəm ki, həmin qadınlar bu rəyləri pis niyətlə yazsınlar, çünki onlara göstərilən və aşılanan "mükəmməl, ideal qadın" imicinə heç zaman sahib ola bilməyəcəklər. Bu səbəbdən depresiyaya düşüb, özünü "bəxtsiz" adlandıran qadınlar az deyil.

Ona görə də hesab edirəm ki, bir qadına "sən hər şeyi bacararsan, güclüsən" demək əvəzinə, "özünü necə xoşbəxt hiss edirsənsə, elə də yaşa, hər şeyi çatdırmaq məcburiyyətində deyilsən, sadəcə bacardığını mümkün qədər mükəmməl şəkildə etməyə çalış" cümlələri deyilsə, həmin qadın daha çox özü ilə barışıqda olub, daha çox özünə güvənəcək. Əks təqdirdə yorğun, həyatdan bezmiş, çiyinlərindəki ağır yüklərlə baş çıxarmağa çalışan, bunu edə bilmədikdə ruhən parçalanmış qadınlar görəcəksiniz. Unutmayaq ki, güclü insan heç vaxt yıxılmayan biri deyil, hər yıxıldıqda yenidən ayağa qalxa bilən kəsdir.

Bir də ki, məncə, qadınları güclü etməyə çalışmaqdansa, xoşbəxt etməyə çalışaq...

Bəs sizcə?..

Fəridə Mustafaoğlu

Telegramda izləyin