Küçələrdə gecələyən qadın dövlət qurumuna "yox" dedi - YENİLƏNİB + VİDEO

Bakıda küçədə gecələyən ahıl qadınla bağlı Sosial Xidmətlər Agentliyi məlumat yayıb.

Məlumatda bildirilir:

"Sözügedən şəxs barəsində Sosial Xidmətlər Agentliyinə məlumat daxil olduğu andan etibarən, əməkdaşlarımız tərəfindən onun axtarışı və ehtiyaca uyğun olaraq agentliyin aidiyyəti müəssisəsinə yerləşdirilməsi barədə proses başladı. Məlum oldu ki, haqqında danışılan qadın Ucar şəhərində qeydiyyatda olan Məlahət Əsgərzadədir. Əməkdaşlarımız Məlahət xanımla söhbət apararaq problemi və küçədə qalma səbəbi ilə maraqlanıblar. Ona ünvanlanan suallara dolğun cavablar verməsə də, məlum olub ki, qadının övladlarından biri Bakıda yaşayır.

Məlahət Əsgərzadə əməkdaşlarımıza və əraziyə dəvət olunan hüquq-mühafizə orqanlarının əməkdaşlarına övladlarının əlaqə nömrəsini təqdim etməyə, həmçinin onlarla əlaqə qurmağa etiraz edərək, tək yaşamaq istədiyini bildirib.

Vətəndaşa hüquqları izah edilərək, Sosial Xidmətlər Agentliyinin tabeliyində olan Həssas əhali qruplarından olan şəxslər üçün sığınacaq və Sosial Reabilitasiya Müəssisəsi barədə ətraflı məlumat verilib. Bildirilib ki, razılığı olacağı təqdirdə onun sığınacağa yerləşdirilməsinə lazımi dəstək göstəriləcək.

Ancaq təəssüf ki, Məlahət xanım müəssisəyə getmək istəmədiyini bildirərək etiraz edib, bütün cəhdlərimizə mənfi reaksiya verib".

17:12
Sosial şəbəkələrdə yaşlı bir qadının naməlum şəxslər tərəfindən artıq 1 həftədən çoxdur ki, Nərimanov rayonu ərazisində olan evlərdən birinin qarşısına qoyulduğu barədə məlumat yayılıb.

BAKU.WS xəbər verir ki, acınacaqlı vəziyyətdə olan qadına kömək etmək, baş verənləri yerində aydınlaşdırmaq məqsədi ilə BAKU.TV-nin əməkdaşları hadisə yerinə gediblər. Kim, hansı səbəbdən bu qadını küçəyə atıb?

Əsgərzadə Məlahət Məmmədhəsən qızı şəkər xəstəsi olduğunu, ayağının birinin işləmədiyini və müalicəyə ehtiyacı olduğunu desə də ona yaxınlaşıb köməklik etmək istədiklərini bildirdikdə çəkiliş qrupuna və ətrafda yaşayan sakinləri təhqir edib.

Gərgin keçən söhbət əsnasında məlum olub ki, oğlu və gəlini qadınla yola getmədiyindən Ramanı qəsəbəsində, Şuşa şəhərciyində yerləşən evindən bir neçə ay öncə çıxıb. İddia edir ki, Əlikram adlı oğlu onunla maraqlanmır, heç axtarmır da.

Buna baxmayaraq Məlahət xanım ona uzanan yardım əllərini geri çevirir, sığınacağa yerləşmək istəmədiyini deyir. Ancaq, bir tələbi var, mənzil. Qadın yaşamaq üçün ayrıca mənzil istəyir.

Yaxınlıqda yaşayan sakinlər iddia edir ki, qadını avtomobillə naməlum şəxslər gətirib əraziyə düşürür.

Çəkiliş vaxtı Nərimanov rayon polis idarəsinin 18-ci polis bölməsinin əməkdaşları da əraziyə yaxınlaşdı. Bildirildi ki, qadınla dəfələrlə proflaktin danışıqlar aparılıb, müvəqqəti yaşayışı üçün sığınacaqlara yerləşdirilib.

Amma qadın bir neçə gün sonra sığınacaqdakıları təhqir edib və oradan ayrılaraq yenidən küçələrdə qalmağa davam edib.

Daha ətraflı videoda.

Telegramda izləyin