Park Yasamaldan ŞİKAYƏT: Kristal Abşeron vətəndaşı evindən çıxarmaq istəyir

Sonxeber.az-ın redaksiyasına "Kristal Abşeron" şirkətindən şikayət daxil olub. Beləki, "Kristal Abşeron" şirkətinin Park Yasamal layihəsində mənzil alan vətəndaşın üzləşdiyi vəziyyət şirkətin müştərilərlə münasibətini yenidən gündəmə gətirir. Beş illik ipoteka ilə mənzil əldə edən, indiyədək ödənişlərini vaxtlı-vaxtında həyata keçirdiyini bildirən Aytən Əhmədova(ad və soyad şərtidir) son iki ayın ödənişini edə bilmədikdən sonra ciddi problemlə üzləşdiyini deyir.

Vətəndaşın iddiasına görə, şirkət onu bloklayıb və mənzildən çıxarmaq istəyir. Belə çıxır ki, illərlə ödəniş edən müştəri cəmi iki aylıq gecikmədən sonra şirkətlə normal ünsiyyət qurmaqda belə çətinlik çəkir. Əgər iddialar təsdiqlənərsə, bu, şirkətin müştəriyə münasibəti ilə bağlı ciddi suallar yaradır.

Mənzil almaq insanın həyatında ən böyük maliyyə öhdəliklərindən biridir. Vətəndaş beş il ərzində ödəniş edib, müqavilə üzrə öhdəliklərini yerinə yetirməyə çalışıbsa, yaranan müvəqqəti çətinlik qarşısında ondan izahat tələb etmək, borcun ödənilməsi üçün qanuni həll yolları təklif etmək əvəzinə, onu evindən çıxarmaqla üz-üzə qoymaq nə dərəcədə doğrudur?

Əlbəttə, müqavilə üzrə ödənişlərin vaxtında həyata keçirilməsi hər bir müştərinin öhdəliyidir. Ancaq bu, şirkətə istədiyi kimi davranmaq hüququ vermir. İki aylıq gecikmənin hansı hüquqi nəticələr doğurması müqavilənin şərtlərindən və qanunvericiliyin tələblərindən asılıdır. Vətəndaşın mənzildən çıxarılması da özbaşına qərarla deyil, müvafiq hüquqi əsaslarla həyata keçirilməlidir.

Şirkət əməkdaşlarının davranışı ilə bağlı ciddi iddia

Aytən Əhmədova "Kristal Abşeron" şirkətinin Nicat Şəfiyev və Aida adlı əməkdaşlarının davranışlarından da narazıdır. Vətəndaş onların hərəkətlərini özbaşınalıq kimi qiymətləndirir. Vətəndaşın sözlərinə görə, şirkətin Aida adlı əməkdaşı vətəndaşa evini satması üçün təzyiq göstərir. Halbuki Aytən Əhmədova yaranmış iki aylıq borcunuda şirkətin verdiyi vaxt ərzində tam şəkildə ödədiyini bildirir. Belə olan halda vətəndaş hansı əsasla evindən çıxarılır? Bütün bunlar azmış kimi "Kristal Abşeron" şirkəti məsuliyyətdən yayınmaq üçün problemi digər tikinti şirkətlərinin üzərinə atır. Aytən Əhmədova həmçinin qanunsuz şəkildə mənzilin mebellərinin şirkət tərəfindən çıxardıldığını bildirir. Vətəndaş həmçinin bu günə qədər bütün ödənişləri vaxt-vaxtlında etdiyinə dair ödəniş qəbzlərinin əlində olduğunu deyir.

Burada şirkət rəhbərliyinə ünvanlanan suallar kifayət qədər ciddidir: Müştərinin müraciət imkanları niyə məhdudlaşdırılıb? Ödəniş gecikməsinin həlli üçün hansı addımlar atılıb? Mənzildən çıxarılma tələbinin konkret hüquqi əsası varmı? Şirkət əməkdaşları vətəndaşla münasibətdə hansı qaydalara əsaslanırlar?

Əgər şirkət həqiqətən də vətəndaşı bloklayıbsa, bu addımın səbəbi izah edilməlidir. Müştərinin borcu varsa, onun məbləği və ödəniş şərtləri aydın şəkildə bildirilməli, məsələ qanuni çərçivədə həll olunmalıdır. Vətəndaşla ünsiyyəti kəsmək və onu mənzilini itirmək təhlükəsi ilə üz-üzə qoymaq problemi həll etmək əvəzinə, daha da dərinləşdirə bilər.

Kristal Abşeron rəhbərliyi cavab verməlidir

Daşınmaz əmlak şirkətləri vətəndaşlardan böyük məbləğlərdə vəsait alır, onlarla uzunmüddətli müqavilələr bağlayırlar. Belə münasibətlərdə məsuliyyət yalnız müştərinin üzərinə düşmür. Şirkət də müqaviləyə, qanuna və müştəri hüquqlarına uyğun davranmalıdır.

Park Yasamal layihəsində baş verənlərlə bağlı "Kristal Abşeron" rəhbərliyi məsələyə aydınlıq gətirməlidir. İki aylıq ödəniş gecikməsinə görə mənzildən çıxarılma məsələsi hansı əsasla gündəmə gətirilib? Vətəndaşın şirkət tərəfindən bloklandığı iddiası doğrudurmu? Nicat Şəfiyev və Aida adlı əməkdaşların davranışları ilə bağlı araşdırma aparılacaqmı?

Vətəndaşın borcu varsa, bu, qanuni qaydada tələb edilməlidir. Ancaq şirkət də özünü qanundan üstün tuta bilməz. Müqavilə öhdəlikləri heç bir tərəfə digərinin hüquqlarını nəzərə almamaq səlahiyyəti vermir.

Material vətəndaşın təqdim etdiyi məlumatlar əsasında hazırlanıb. Şirkətin mövqeyi hələ əldə edilməyib; səsləndirilən iddialara münasibət bildirmək imkanı verilməlidir. Maraqlıdır ki, şirkət vətəndaşa qarşı özbaşınalıq edən Nicat Şəfiyev və Aida adlı əməkdaşları barəsində hansı tədbirləri görəcək?

P.S Qeyd olunan iddialarla bağlı qarşı tərəfində mövqeyini dərc etməyə hazırıq.

Müəllif: İlkin Məmmədkərimov

Telegramda izləyin