"Məhz Heydər Əliyevin dönüşü dövləti parçalanmadan, xalqı isə əsarətə düşməkdən xilas etdi"

Xəbər verdiyimiz kimi, dünya şöhrətli siyasi xadim, xalqımızın Ümummilli lideri Heydər Əliyevin vəfatından 18 il keçir. Bu gün Ulu Öndərimizin anım günüdür.

Bununla bağlı Sonxeber.az-a deputat Bəhruz Məhərrəmov münasibət bildirib.

O, qeyd edib ki, nə qədər ki, bu dövlət var, nə qədər ki, bu xalq mövcuddur, Heydər Əliyev həmişə ən ülvi hisslərlə anılacaq:

"Səbəbi çox sadədir. Hər şeydən öncə ona görə ki, müstəqillik tariximiz, daha doğrusu istiqlaliyyətimizin qorunması məhz onun adı ilə bağlıdır. 18-ci anım günündə dahi lideri sevgi və ehtiramla anırıq.

Sovetlər birliyinin dağılmasının təbii axarı kimi, bütün ittifaq dövlətləri ilə bərabər, Azərbaycanın müstəqillik qazanması ilə məsələnin bitdiyini zənn edənlərdən fərqli olaraq, Heydər Əliyev o qənaətdə idi ki, müstəqilliyin əldə olunması nə qədər çətindirsə, onun saxlanılması, əbədi olması ondan da mürəkkəb prosesdir.

1991-ci ildə müstəqillik bərpa edildikdən sonra cəmi il yarımlıq period kifayət etdi ki, dahi liderin nə qədər haqlı olduğu üzə çıxsın. Gözlər də, ümidlər də yenə ona tikildi. Prezident, Parlament sədri, Baş nazir, bütövlükdə hökumət tam tərkibdə "iş başında" olsa da, xalq o zamankı mövcud "stajor" idarəçiliyə yox, 13 il Bakıda, 4 il isə Moskvadan bu ölkənin yükünü təkbaşına daşıyan, sınanmış Heydər Əliyev dühasına üz tutdu. Müdrik xalq bu dəfə də yanılmadı: məhz Heydər Əliyevin dönüşü dövləti parçalanmadan, xalqı isə sözün əsl mənasında əsarətə düşməkdən xilas etdi.

Ən azı 5 min illik ənənəyə malik Azərbaycanın dövlətçilik tarixində Heydər Əliyev fenomeni həm də ona görə xüsusi seçilir ki, o, yalnız öz dövrü üçün yox, özündən sonra da ideyaları ilə xalqın taleyində müstəsna rol oynamaqda davam edir. Bu gün cənab İlham Əliyev və Mehriban xanım Əliyeva tərəfindən yaşadılan və uğurla davam edilən bu titanik irsin əsl mahiyyətinin ən yaxşı ifadəsi isə elə zamanın özüdür.

Dahi lider "İqtisadiyyatı güclü olan dövlət hər şeyə qadirdir",-deyirdi. Cənab İlham Əliyev nəinki bölgənin ən güclü və dayanıqlı iqtisadiyyatını qura bildi, üstəlik, Azərbaycanın iqtisadi müstəqilliyini tam mənada təmin etdi.

Ulu Öndər, "Xalqla ordunun birliyi həm xalqın qüdrətini artırır, həm də ordunu daha qüvvətli edir",- deyirdi. Cənab İlham Əliyev heç vaxt olmadığımız qədər möhkəm milli həmrəyliyin təmin olunmasına nail oldu.

Heydər Əliyev "Sülh danışıqlarını cəsarətlə apara bilmək üçün güclü orduya malik olmaq lazımdır",- deyirdi. Cənab İlham Əliyev dünyanın ən güclü ordularından birini qurub işğala, təcavüzə son qoydu, VI nəsil müharibə aparıb düşmənin kapitulyasiyasına nail olaraq, Beynəlxalq hüququn aliliyini təmin etdi, Azərbaycan tarixində heç kimə nəsib olmayan Müzəffər Ali Baş Komandan adına layiq görüldü.

Beləliklə, bu fonda cərəyan edən gedişat Azərbaycanı 44 günlük savaş sonrası, tarixinin ən böyük zəfərinə qovuşdurdu. Qalibiyyət elan edilərkən də Müzəffər Ali Baş Komandan dünyanın gözü önündə Ata vəsiyyətini yerinə yetirməyin xoşbəxtliyini xalqı ilə bölüşərək, vəsiyyəti zəfər olan Heydər Əliyev şəxsiyyətinin böyüklüyünü bir daha ortaya çıxardı. O şəxsiyyət bu gün cismən bizimlə olmasa da, ziyası illər keçdikcə bizi daha çox nuruna qərq etməkdədir".

Aysel Səfərzadə

Telegramda izləyin