Evlər söküləndə qiymətlər arta bilər - Ekspert XƏBƏRDARLIQ ETDİ

Xırdalanda evlərin sökülməsi və sakinlərin köçürülməsi ilə bağlı mümkün qərar həmin ərazidə daşınmaz əmlak bazarına, mənzil qiymətlərinə və vətəndaşların mülkiyyət hüquqlarına təsir göstərə bilər. Belə hallarda söküntünün miqyası, ərazinin yerləşməsi və alternativ yaşayış sahələrinə tələbat qiymət dinamikasında rol oynaya bilər. Eyni zamanda, ev sahiblərinə ödəniləcək kompensasiyanın məbləğinin müəyyənləşdirilməsi, əmlakın real bazar dəyərinin nəzərə alınması və sakinlərin köçürülmə zamanı hüquqlarının qorunması xüsusi əhəmiyyət daşıyır.

Bəs, Xırdalanda mümkün söküntü və köçürülmə prosesi həmin ərazidə mənzil qiymətlərinə necə təsir edə bilər? Kompensasiya hesablanarkən hansı meyarlar əsas götürülməli, sakinlərin hüquqlarının qorunması və alternativ mənzillə təmin olunması üçün hansı şərtlər nəzərə alınmalıdır?
Mövzu ilə bağlı Sonxeber.az-a açıqlama verən əmlak məsələləri üzrə ekspert Elnur Azadov bildirib ki, kütləvi söküntü işləri aparıldıqda daşınmaz əmlaka tələbat artır.

"Azərbaycanda, xüsusilə Bakı və Sumqayıt şəhərlərində daşınmaz əmlaka tələbatın yüksək, təklifin isə məhdud olması alıcılar üçün müəyyən çətinliklər yaradır. Söküntü zamanı dövlət tərəfindən təklif olunan kompensasiyalar isə vətəndaşlar tərəfindən heç də həmişə birmənalı qarşılanmır. Mənim fikrimcə, bu məsələdə ümumi yanaşma tətbiq edilməməli, hər bir daşınmaz əmlak fərdi qaydada qiymətləndirilməlidir. Adətən, ərazidəki daşınmaz əmlakın orta qiyməti müəyyənləşdirilir və kompensasiya həmin göstərici əsasında hesablanır. Lakin nəzərə almaq lazımdır ki, ərazidə həm yeni tikilmiş, həm aşınmış, həm də yüksək təmirli mənzillər ola bilər".

Ekspert bildirib ki, bütün əmlakların eyni meyarlarla qiymətləndirilməsi vətəndaşların narazılığına səbəb ola bilər:

"Qiymətləndirmə zamanı daşınmaz əmlakın sənədlərinin olub-olmaması, binanın ümumi vəziyyəti, mənzilin təmir səviyyəsi və digər xüsusiyyətləri nəzərə alınmalıdır. Bundan əlavə, əmlaka sonradan əlavə tikili, yardımçı sahə və ya torpaq sahəsi daxil edilibsə, bunlar da ayrıca yaxşılaşdırma kimi qiymətləndirilməlidir. Beləliklə, hər bir daşınmaz əmlakın fərdi xüsusiyyətləri nəzərə alınmalı və vətəndaşa əmlakının real vəziyyətinə uyğun kompensasiya ödənilməlidir".

Röyalə Xəyal

Telegramda izləyin