Benzema 300-ə çata bilmədi, türk futbolçu "Real"ın 15 oyunluq seriyasına son qoydu - VİDEO

İspaniya La Liqasının XIX turunda Madrid "Real"ı səfərdə "Xetafe" ilə qarşılaşıb.

Oxu.Az xəbər verir ki, görüş meydan sahiblərinin qələbəsi ilə yekunlaşıb.

Qarşılaşmanın 9-cu dəqiqəsində "Xetafe"nin türk futbolçusu Enes Ünalın vurduğu qol matçda yeganə olub.

Bununla da "kral klubu" oktyabr ayından bəri keçirdiyi ümumilikdə 15-ci oyundan (11 La Liqa, 4 Çempionlar Liqası) sonra ilk dəfə məğlubiyyət acısı dadıb.

Buna qədər sonuncu dəfə oktyabrın 3-də La Liqada "Espanyol"a uduzan madridlilər keçirdikləri 15 oyundan 13-də qələbə qazanmış, iki matçda isə sülhə razılaşmışdı.

Bundan əlavə, bu qarşılaşmaya qədər "Real"ın heyətində 299 qol vurmuş Karim Benzema yubiley arzusunu gerçəkləşdirə bilməyib. Fransa millisinin forvardı bunun üçün ən az bir oyun daha səbr etməlidir.

Matçda vurulan yeganə qolu təqdim edirik:

Telegramda izləyin