"İpoteka Azərbaycanda ehtiyacı olan insanlar üçün nəzərdə tutulmayıb" - Deputatdan SƏRT TƏNQİD

Bu gün ölkəmizdə ailə münaqişələrinin, boşanmaların sayı artır. Çoxları isə bunun səbəbini kasıbçılıq və evsizliklə əlaqələndirirlər. Vətəndaşlar kredit və ipoteka faizinin yüksək olduğunu bildirirlər. Ev almaq istəyənlər nə qədər maaş almalıdırlar ki, ipotekanın pulunu ödəyə bilsinlər?

Məsələ ilə bağlı Sonxeber.az-a deputat Razi Nurullayev fikir bildirib.

O, ipotekaya münasibətinin çox yaxşı olduğunu, lakin əl çatan olmadığına görə təəssüfləndiyini bildirib:

"Ümumiyyətlə, Azərbaycandakı ipoteka məsələsi bərbad olmasa da, çox ədalətsiz şəkildə tətbiq olunur: yalnız yüksək əməkhaqqı alanlar evlə təmin oluna bilərlər.

Halbuki maaşı yüksək olan insan onsuz da bu və ya digər şəkildə ehtiyacını ödəyə bilir.

Amma bu gün ölkəmizdə nə qədər insan yüksək əməkhaqqı alır ki, ipoteka krediti ilə özünə ev ala bilsin?

Digər tərəfdən, Azərbaycandakı evlərin qiyməti az qala Nyu-York evlərinin qiymətinədir.

Dünyanın heç bir yerində bu qədər anormallıq yoxdur. Yəni belə çıxır ki, Bakıdakı evlər Berlindən, Brüsseldən bahadır. Amma bunun heç bir məntiqi əsası yoxdur və belə bir vəziyyətdə, təbii ki, ipotekanın hazırkı əlçatanlığı kifayət deyil.

Ən birinci məsələ budur ki, ipoteka krediti verilirsə, mütləq Azərbaycandakı maaşlara uyğun şəkildə verilməlidir.

Azərbaycanda nə qədər insan 1000-1500 əməkhaqqı alır ki, ipotekayla ev ala bilsin?

Azərbaycanda hazırda tətbiq olunan ipoteka faizi ölkəmizə uyğundur, lakin tələblərə əsasən, minimal olaraq 1000 manatdan çox əməkhaqqı almalısan. Bunu isə ancaq dövlət idarələrində işləyənlər alır. Belə çıxır ki, digər insanlar evsiz-eşiksiz qalacaqlar.

Azərbaycanda sosial cəhətdən həssas təbəqəyə aid insanlar az deyil. Jurnalistlər, gənc ailələr, gənc alimlər, kəndçilər bura daxildir.

Bu səbəbdən Azərbaycanda görün nə qədər insan kirayə qalır.

Azərbaycanda bununla bağlı qanun da qəbul olundu ki, bir insan bir yerə illərlə kirayə ödədikdən sonra həmin ev onun özünə qala bilər.

Dünyada da bu təcrübə tətbiq olunub, Azərbaycanda isə qanun qəbul olunsa da, icra olunmur.

Mənə belə gəlir ki, ipoteka qanunu yalnız 1000 manatdan yuxarı maaş alanlar üçündür. Ona görə də bunu sosial qanun hesab edə bilmərik. İpoteka Azərbaycanda ehtiyacı olan insanlar üçün nəzərdə tutulmayıb".

ZAİRA AKİFQIZI

Telegramda izləyin