Sağlığında bir çox medallara layiq görülən şəhidimizi tanıyın - FOTO

Əslən Laçın rayonundan olan igidimiz Elzamin Təhməzov 44 günlük Vətən müharibəsinin ilk şəhidlərindəndir.

Sonxeber.az-ın məlumatına görə, Azərbaycan Ordusunun polkovnik-leytenantı olan Təhməzov 27 sentyabr 2020-ci il tarixində Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Suqovuşan qəsəbəsinin azadlığı uğrunda gedən döyüşlərdə savaşıb.

Sentyabrın 28-də Suqovuşan döyüşləri zamanı şəhid olan polkovnik Bərdə şəhərinin Şəhidlər Xiyabanında dəfn olunub.

İgid şəhidimiz Prezident İlham Əliyev tərəfindən ölümündən sonra "Vətən uğrunda" medalı ilə, 3-cü dərəcəli "Rəşadət" ordeni ilə və eyni zamanda "Suqovuşanın azad olunmasına görə" medalı ilə təltif edilib.

Bunlardan əlavə, Elzamin Təhməzov hələ sağ ikən də bir çox medallara layiq görülüb:

(26.06.2001) — "Azərbaycan Silahlı Qüvvələrinin 10 illiyi" yubiley medalı
(26.06.2008) — "Azərbaycan Silahlı Qüvvələrinin 90 illiyi" yubiley medalı
(26.06.2010) — "Qüsursuz xidmətə görə" 3-cü dərəcəli medal
(26.06.2013) — "Azərbaycan Silahlı Qüvvələrinin 95 illiyi" yubiley medalı
(26.06.2015) — "Qüsursuz xidmətə görə" 2-ci dərəcəli medal
(26.06.2018) — "Azərbaycan Ordusunun 100 illiyi" yubiley medalı
(26.06.2020) — "Qüsursuz xidmətə görə" 1-ci dərəcəli medal

Qeyd edək ki, şəhid Elzamin ailəli olub və 2 qızı yadigar qalıb.

Aysel SƏFƏRZADƏ

Telegramda izləyin