"Uşaqların əlinə telefon, kompüter, planşet verib evdə oturtmaqdansa..." - Pediatrdan MƏSLƏHƏT

İstiqamət: Uşaq və gənclərin fiziki və mənəvi inkişafı

"Uşaqları qorumağın ən yaxşı yolu düzgün qidalanmalarını təmin etmək, onlara doğru rejim qurmaqdır".

Bu sözləri Sonxeber.az-a pediatr Ellada Nağıyeva açıqlama verərkən söyləyib.

O bildirib ki, immun sisteminin inkişafı üçün, uşağı xəstələnməkdən tamamilə qoruyan dərman vasitəsi yoxdur:

"Bu səbəbdən immun sisteminin güclü olması, vaxtında orqanizmin bu viruslara yaxşı cavab verməsi, daha yüngül keçirməsi üçün ən başda valideynlərin etməli olduğu əsas məsələ uşaqları sağlam qidalandırmaq, rejimlərini düzgün qurmaqdır.

İkinci əsas məsələ isə gigiyenadır. Doğrudur, pandemiya dövründə insanlar nisbətən maarifləndilər, amma daha çox diqqət etmək lazımdır. Kollektivə çıxan azyaşlılar təəssüf ki, daha çox xəstələnirlər. Uşaqlarımız xəstələndiyi zaman biz onları kollektivə buraxmasaq, bu virus zəncirini qıra bilərik. Valideyn olaraq, təkcə öz övladımızı deyil, başqa uşaqları da qorumalıyıq.

Hazırda texnologiyanın inkişafı ilə əlaqəli, xüsusən də son iki ildə pandemiyaya görə uşaqlarda fiziki aktivlik çox aşağı səviyyəyə düşüb. Mən çox təəssüf edirəm ki, məktəblərdə fiziki tərbiyə dərsləri çox zəif formada keçirilir.

Bir valideyn olaraq, nə etmək lazımdır? Uşaqlar üçün fiziki aktiv saatlar təşkil etməliyik. Onların fiziki aktivliyini təmin etməliyik. Onların əlinə telefon, kompüter, planşet verib evdə oturtmaqdansa, parka çıxartmalı, gəzdirməliyik. Çox gözəl coğrafiyada yaşayırıq. İstər qış, istər yay, ilin hər fəslində parka, çölə çıxmaq kimi şansımız var. Ən gözəl sağlamlıq təmiz hava qəbul etməkdən başlayır.

Mənəvi inkişaf məsələsi psixoloqların ixtisası çərçivəsində olsa da, bunu deyə bilərəm ki, mənəvi inkişaf ailənin quruluşundan asılı olan bir haldır".

Material Azərbaycan Respublikası

dəstəyi ilə hazırlanmışdır.

Aysel SƏFƏRZADƏ

Telegramda izləyin