""TikTok"u ona görə açdım ki..." - Deputatdan AÇIQLAMA

Xəbər verdiyimiz kimi, deputat Ceyhun Məmmədov bu yaxınlarda özünə "TikTok" səhifəsi açmaqla gündəmə gəlib. Onun bu addımını tənqid edənlər olsa da, dəstəkləyənlər də az olmayıb.

Sonxeber.az deputatın özünə "TikTok" səhifəsi açmasının səbəbini öyrənib.

Ceyhun Məmmədov bildirib ki, son zamanlar sürətlə inkişaf edən "TikTok" ən çox istifadə olunan sosial şəbəkələrdən biridir:

"Adətən "TikTok"da əyləncə xarakterli videolar paylaşılır. Bir müddətdir ki, mən də müşahidə yolu ilə ümumi prosesi təhlil edirdim. Bu gün nail olmağa ən çox çalışdığım və qarşıma qoyduğum məqsədlərdən biri gənclərlə daha sıx işləmək, onların inkişafına tövfə verməkdir.

Baxdım ki, burada gənclər çoxdur və əksəriyyəti əyləncəli videolar paylaşır. Yəni biz burada belə videoların daha geniş paylaşıldığını görürük.
Amma "TikTok"un bir üstün cəhəti odur ki, videoların izlənmə sürəti burada daha çoxdur. Bu sosial şəbəkədə paylaşılan videoların daha çox kütləni əhatə etdiyinin şahidi oldum.

Hesab edirəm ki, bu platforma sürətlə inkişaf etdiyi üçün gələcəkdə orada digər istiqamətlərdə də videoların paylaşıldığının şahidi olacağıq.
Düşündüm ki, gənclər bu şəbəkədən istifadə edirlərsə, orada yalnız əyləncə olmasın, gənclərə istiqamət verən videolar da olsun. Onların gələcəyinə töhfə verə biləcək videolar da paylaşaq.

Zaman-zaman müxtəlif tövsiyələrimiz olub, müxtəlif verilişlərdə iştirak edirik.

O baxımdan düşündüm ki, belə videolar paylaşaraq orada toplaşan gənclərə öz səsimizi çatdıraq.

Ümumiyyətlə, bu gün bir sıra hallarda gənclərin daha çox əyləncəyə meyil göstərdiyini müşahidə edirik.

Əlbəttə, istirahət üçün müəyyən əyləncə də olmalıdır. Amma hesab edirəm ki, gənclərimiz həm də oxumağa, öyrənməyə, maariflənməyə, yeni biliklər əldə etməyə də maraqlı olmalı, cəhd etməlidirlər.

Bu gün belə gənclərimiz var və mən də qərara gəldim ki, belə bir səhifə açaraq daha çox təhsillə, Milli Məclisdəki fəaliyyətimlə bağlı müəyyən videoları paylaşım.

Artıq paylaşımlara başlamışam. Görürəm ki, orada videoların izlənmə sürəti və effekti daha çoxdur. Bu səbəbdən müəyyən fikirlərin çatdırılması üçün sözügedən platformadan istifadə etmək lazımdır.

Bu platforma bizə əslində geniş imkanlar yaradır və onlardan istifadə etməyimiz gərəkdir".

Səmimi videolarının paylaşılması ilə bağlı suala isə depuat belə cavab verib:

"Hazırda paylaşımlarım daha çox fəaliyyətimlə bağlıdır. Amma digər fikirlərimi də paylaşmış ola bilərəm. Əlbəttə, biz şou ilə məşğul deyilik. Bizim öz fəaliyyətimiz, istiqamətimiz var. Mənim əsas hədəfim və məqsədim fikirlərimi gənclərə çatdırmaq, vətənpərvərlik ruhunda, elm və biliyə marağın artırılması istiqamətində videolar paylaşmaqdır".

ZAİRA AKİFQIZI

Telegramda izləyin