Ukraynanın "Yuxu"su məhv edildi - 3 milyard dollarlıq ZƏRƏR - FOTO

Ukraynanın "Antonov" dövlət təyyarə istehsalı və servisi şirkəti Ukrayna dilində "yuxu" mənasını verən "Mriya" adlı "An-225" tipli təyyarəsi Qostomel hava limanında rus əsgərlərinin hücumları nəticəsində məhv edilib.

Sonxeber.az xarici mətbuata istinadən xəbər verir ki, Ukraynanın "Ukroboronprom" aviasiya şirkətinin açıqlamasında deyilir ki, "Mriya" kimi tanınan təyyarənin bərpası 5 ildən çox vaxt aparacaq və 3 milyard dollardan çox vəsaitə başa gələcək.

"Ukroboronprom" bildirib ki, Rusiyanın vurduğu "Mriya" Ukraynanın aviasiya qabiliyyətinin simvoludur.

Ukraynanın xarici işlər naziri Dmitro Kuleba hadisə ilə bağlı bu sözləri deyib:

"Rusiya bizim "Mriya"mızı məhv etmiş ola bilər, amma güclü, azad, demokratik Avropa dövləti olmaq arzumuzu heç vaxt məhv etməyəcək. Biz qalib gələcəyik!"

Qeyd edək ki, dünyanın ən böyük və ən güclü təyyarəsi olan "An-225" SSRİ dövründə kosmik gəmi daşıyıcısı kimi yaradılıb. Sovet İttifaqının dağılması ilə bu layihə başa çatıb. 2000-ci ildən yük təyyarəsi kimi istifadə olunan və tonlarla material daşıya bilən "Mriya"dan pandemiya zamanı da fəal şəkildə istifadə olunub.

Aygün Osmanlı

Telegramda izləyin