"Yazı artıq dərc olunubsa, fikir bildirmək nəyə yarayır?!" - Mətbuat katibindən JURNALİSTLƏRƏ

"Biz haqqımızda yayılan dezinformasiyanı aradan qaldırmaq üçün məcbur olub bu işin arxasınca düşürük"

Bu sözləri "Kapital Bank"ın İctimaiyyətlə əlaqələr şöbəsinin rəisi Pərviz Sədrəddinov Sonxeber.az-a mətbuatla bağlı açıqlamasında söyləyib.

O bildirib ki, bəzi saytlar ancaq reytinq axtarır və jurnalistikanın prinsiplərindən kənar işləyirlər:

"Əvvəlki mətbuatla indiki mətbuatdakı işin arasında olan fərqi düşündükcə, təbii ki, informasiyanı əldə etmək hazırda daha asandır. Əvvəllər jurnalistika sahəsində işləməyə başlayanda bizə redaktorlarımız izah edirdilər ki, istənilən yazıda 3 tərəf var: yazan, ittiham edən və şikayətə cavab verən . Bizim yazıda bu 3 tərəfin də mövqeyi olmasa, o, yazını qəbul etməzdi. Deyərdi: "Get yerin dibində də olsa, tap, mövqe öyrən!" O vaxtı da internet, əlaqələr bu qədər əlçatan deyildi. Bir balaca xəbərə günlərlə vaxtımız gedərdi. İndi isə iş rahatlaşıb, amma problemlər də artıb. Çox vaxt nəsə eşidirlər, yazırlar. Dərc etdikdən sonra yazırlar: "Bu barədə yazı vermişik, sən də fikrini bildir". Yazı artıq dərc olunubsa, fikir bildirmək nəyə yarayır?! Bəzən də açıqlamanı da alıb, sensasiya yaradaraq ayrı xəbər formasında yayımlayırlar. Bunlar problem deyil, ola bilər, hər bir mətbuat orqanının öz strategiyası var. Amma bəla budur ki, yayımlayırlar, sosial şəbəkəyə də yerləşdirirlər, nəinki real insanlar tərəfindən idarə olunan saytlar, eləcə də robot saytlar həmin xəbəri dərc edir. Sən düzgün məlumat versən də, robot sayt ikinci açıqlamanı yenidən yayımlamaya da bilər. Bəzən isə naməlum şəxslər tərəfindən idarə olunan saytlar dərc edir. Saytda yazdığı nömrə, "mail" vasitəsilə onlarla əlaqə saxlamaq olmur. Biz haqqımızda yayılan dezinformasiyanı aradan qaldırmaq üçün məcbur olub, işin arxasınca düşürük, axtarırıq. Bu, məsələnin neqativ tərəfidir.

Demək olar ki, jurnalistika da "Agile" (çevik) idarəetmə prinsipi ilə çalışır. Çox vaxt qarşı tərəfin fikrini yayımlamırlar. Təbii ki, bu, hamıya aid deyil, bəzi saytlar yaxşı işləyir, bəziləri isə ancaq reytinq axtarır və jurnalistikanın prinsiplərindən kənar fəaliyyət göstərirlər".

Aysel SƏFƏRZADƏ

Telegramda izləyin