Azərbaycanlı məşqçi Ukraynadan çıxa bilmir, zirzəmidə qalır

"Səbail" futbol klubunun məşqçisi Aydın Manaflı Ukraynada qalıb.

13 yaşlılardan ibarət komandanın məşqçisi olan Manaflı bununla bağlı özü Sportfm.az saytına məlumat verib.

Fevralın 19-da Ukraynanın paytaxtı Kiyevə UEFA-nın "B" kateqoriyalı məşqçi lisenziyasının yenilənmə kurslarında iştirak etmək üçün yollanan gənc mütəxəssis 27 fevralda Bakıya dönməliymiş. Amma Rusiya qoşunlarının Ukraynaya işğalçı hücumu nəticəsində müharibə başladığı üçün 29 yaşlı çalışdırıcı oradan çıxa bilməyib.

24 fevraldan etibarən Azərbaycan səfirliyi ilə əlaqə yaratsa da, aradan 5 gün keçməsinə baxmayaraq, ad-soyad götürmələrinə rəğmən, əlaqə yaradan olmayıb.

"Səbail"in əməkdaşı Azərbaycan diplomatik missiyasından eşitdiyi sözlər bunlar olub: "Təxliyə yoxdur. Yalnız öz yolunuzla Polşa və ya Moldovaya gedə bilərsiniz".

"Hazırda Kiyevin mərkəzində "Palats Ukraina" metrosunun yaxınlığındakı bir yaşayış binasının zirzəmisində qalırıq. Ancaq burada qalmağa nə qədər dözə biləcəyik, onu bilmirəm. Azərbaycan Xarici İşlər Nazirliyindən xahiş edirəm, bizi burdan çıxarsınlar", – deyə Aydın Manaflı bildirib.

Telegramda izləyin