Zərərçəkmiş sürücü: "Deyirdi ki, 300 min manat verməsən, MTN-dən çıxan deyilsən"

Keramika, kafel-metlax satışı ilə məşğul olan "Santemax" MMC-də sürücü işləmiş Arif Allahverdiyev Mövlam Şıxəliyev və digərilərinin cinayət işi üzrə istintaqa cəlb edilməyən zərərçəkmiş şəxslərdəndir.

Arif Allahverdiyev Qaynarinfo-ya müraciət edərək deyib ki, 1 il müddətində qanunsuz olaraq Milli Təhlükəsizlik Nazirliyinin (MTN) İstintaq Təcridxanasında girov saxlanılıb.

"2010-cu ildə çalışdığım "Santexmax" MMC-nin təsisçisi Əhməd Mirzəyev mənə iş tapşırdı. Otağına çağırıb bir bağlama verdi və Zaur adlı şəxslə telefonla danışdı. Zaura telefonda dedi ki, sürücü Arifi yollayıram, mala bax və elə Arifə də ver geri gətirsin. Mənə Zaurun telefon nömrəsini də verdi. Zaurla əlaqə saxladım, evinin yerini dedi", - deyə o bildirib.

İki övlad atası olan Arif Allahverdiyev "Santexmax" mağazasında sürücü işləyib:

"Mən gün ərzində Əhməd Mirzəyevin tapşırığı ilə bir çox ünvanlara kafel-metlax, aksesuar aparırdım. Həmin gün də Əhməd Mirzəyev mənə tapşırıq verdi ki, içində nə olduğunu bilmədiyim bağlamanı aparıb Zaur Əliyevin evinə çatdırım və sonradan geri qaytarım. Axşamüstü idi, Zaurla əlaqə saxladım, evinin ünvanını dəqiqləşdirdirdim. Dedim ki, Əhməd müəllim sizə bağlama yollayıb. O da ünvanı deyib məni gözlədiyini bildirdi. Zaurun evinə getdim, bağlamanı verdim. O da məni çaya dəvət etdi. Zaur dedi ki, çay içək, səni yola salacağam. Elə yenicə oturdum ki, qapı döyüldü. Zaur qapıya getdi. Qapı açıqlan kimi MTN-çilər evə basqın etdilər. 5 nəfər idilər, onlara rəhbərlik edənin adı Mamay idi. Özünü Mamay Quluzadə kimi təqdim etdi. Nə baş verdiyini anlamadım".

Sürücünün sözlərinə görə, gələnlər onun apardığı bağlamanı açıblar:

"Zaurun evinə apardığım bağlamanı açdılar, içindən mərmərdən olan balta çıxdı. Orada olduğumuz müddətdə MTN-çilər evdə axtarış apardılar. Zaur da onlardan axtarışla bağlı məhkəmə qərarı tələb edirdi. Mamay da ona dedi ki, evin yanında MTN-nin antiterror əməliyyat qrupu gözləyir, zəng eləsə, evə maskalılar basqın edəcək. Mamay bundan sonra onunla gələnlərdən birinə MTN-də öz xidməti otağının açarını verib iş yerinə yolladı. Bir qədər sonra həmin MTN-çi də qayıdıb gəldi, əlində bir ovuc qızıldan ibarət xırda heykəlləri vardı. Onları da baltanın yanına qoyub dedi ki, bunları da Zaurun evindən götürmüşük. Protokol tərtib etdilər. Zaurdan və məndən tələb etdilər ki, protokolu imzalayaq. Protokolda nə istəmişdilər, onu da yazmışdılar. Zaur da, mən də etiraz olaraq, heç bir sənədə qol çəkmədik. Mamay dəstəsinə dedi ki, gedək, sonra məsələni həll edərik. Zaura gətirdiyim bağlamanı da, özlərinin xırda heykəllərini də götürüb getdilər".

Sürücü Arif Allahverdiyev deyib ki, bundan sonra Zaur Əliyevin evini tərk edərək iş yerinə qayıdıb, Zaurun evində baş verənləri Əhməd Mirzəyevə danışıb:

"Bir həftə sonra məni də, Əhməd müəllimi də MTN-ə çağırdılar. Ora getdik. Mənimlə Təhsin Ağayev danışdı. Dedi ki, müstəntiqlərin rəhbəridir. Məndən qaçaqmalçılıqla bağlı soruşdu. Dedim ki, mən sürücüyəm, harada sərhəd keçdim ki, qanunsuzluq da edəm, qaçaqmalçılıqla məşğul olam? Təhsin Ağayev cılız, balacaboy biri idi, tez-tez də əli ilə saçına tumar çəkib məndən pul istəyirdi. Mənə hədə-qorxu gəlir, pul tələb edirdi. Deyirdi ki, 300 min manat verməsən, MTN-dən çıxan deyilsən. Ona deyirdim ki, mən sürücüyəm, məndə o qədər pul yoxdur, heç olmayıb da. O qədər bezdirmişdi ki, əsəblərim dözmürdü. Təhsin Ağayevə dedim ki, mən maaşa işləyən sürücüyəm, niyə başa düşmək istəmirsən. Sənə 300 manat, uzağı 3 min manat borc alıb verə bilərəm. Dirəşmişdi ki, qohum-əqrəbandan yığın, verin".

Sürücü deyir ki, pul verə bilmədiyi üçün onu MTN təcridxanasında bir ilə yaxın qanunsuz olaraq saxlayıblar:

"Mənə Zaurun evində tərtib etdikləri protokolu sonradan imzalamağa məcbur etmişdilər. Dedilər ki, protokolu imzalamasan, başına oyun açacağıq. Həbsdə olduğum müddətdə məni dindirən, danışdıran olmurdu. MTN-də niyə görə saxlanıldığımı anlaya bilmirdim bu günə kimi anlamıram".

Arif Allahverdiyev qeyd edib ki, həbsdən çıxandan onun azad edilməsi üçün Əhməd Mirzəyevdən Ağır Cinayətlər Məhkəməsinin hakimi Əfqan Hacıyev külli miqdarda pul alıb:

"Əhməd müəllim özünün barəsində və mənim həbsdən cəzasız çıxmamağım üçün 80 min manat pulu hakimə verib. Əfqan Hacıyev pulu alandan sonra barəmizdə şərti cəza verdi. Məhkəmədə bildim ki, istintaq zamanı Əhməd müəllimdən Təhsin Ağayev 500 min dollar pul alıb zaminə buraxıb".

Sürücü deyir ki, bu günə qədər də Əhməd Mirzəyevə borcu var:

"Təhsin Ağayev, onun rəhbərləri məni heç bir günahım olmadan qanunsuz olaraq həbsə saxladılar, ailəmi çətin duruma saldılar. Bu gün də borc-xərcin içindəyik. Məni isə ümumiyyətlə istintaqa çağırmayıblar. Şahid kimi belə dindirməyiblər, zərərçəkən kimi də tanımayıblar".

Telegramda izləyin