Rusiya bir sutkada necə 5 təyyarə itirdi?

Rusiya son sutka ərzində 5 təyyarə və 4 helikopter itirib. Bu, onun göstəricisidir ki, əvvəla, Ukrayna HHM sistemi işləyir və Rusiyanın xüsusən müharibənin ilk saatlarında qanadlı raketlərlə həyata keçirdiyi şiddətli bombardman öz məqsədinə çatmayıb və Ukrayna aviasiyası hələ məhv olmayıb.

Bu sözləri politoloq Şahin Cəfərli Ukraynada Rusiyanın aviasiya itkiləri haqda qeyd edib.

O bildirib ki, digər səbəb Ukraynaya NATO ölkələrindən külli miqdarda "Stinger", "Piroun" kimi yüngül, daşınan zenit-raket sistemlərinin daxil olmasıdır, artıq bütün hərbi birləşmələrdə, o cümlədən ərazi müdafiə qüvvələrində bu silahlardan var:

"Üçüncüsü, yerdə problemlə üzləşən Rusiya qüvvələri aviasiya dəstəyinə daha çox ehtiyac duymağa başlayıb. Komandanlıq aviasiyadan əvvəlki günlərə nisbətən son günlər daha intensiv istifadə edir.

Dördüncüsü, hərbi təyyarələr bəzən hava şəraitinə, bəzən hədəflərə daha dəqiq zərbə endirmək ehtiyacına görə (Rusiyanın ağıllı bomba ehtiyatı çox məhduddur) alçaq uçuşa keçməyə məcbur olur və bu zaman çiyindən atılan raket sistemlərinin atəş mənzilinə (3500-4000 metr) daxil olurlar".

Politoloq həmçinin xatırladıb ki, Rusiyanın Ukrayna əməliyyatı üçün ayırdığı "Kalibr" qanadlı raketlərinin böyük əksəriyyətini indiyədək istifadə etdiyi də iddia olunur./Axar

Telegramda izləyin