"Onların sayəsində iki ildir ki, bayramlarımızı qalib ölkənin vətəndaşı kimi qeyd edirik"- DEPUTAT

"Vətən müharibəsindən sonra bütün bayramları qürur və fəxarət hissi ilə qeyd edirik".

Bunu Sonxeber.az-a danışan deputat İqbal Məmmədov deyib.

Deputat qeyd edib ki, Azərbaycan xalqı üçün Novruz bayramının xüsusi dəyəri var:

"Çünki müstəqillik əldə etdikdən sonra dövlət səviyyəsində qeyd edilən bu qədim el bayramı tarix boyu qadağalara və təqiblərə məruz qalsa da, öz gözəlliyini indi də saxlayır. Novruz bayramı dostluq, həmrəylik bayramıdır. Təəssüf ki, bu bayramın qeyd edilməsi SSRİ dövründə rəsmi olaraq qadağan edilmişdi. Lakin Ulu Öndər Heydər Əliyev milli ənənə və dəyərlərə söykənən bu bayramın xalq arasında sevilərək yaşadılmasını təmin edib.

Bilirsiniz ki, məhz ötən əsrin 70-ci illərində Novruz bayramı ilk dəfə olaraq Ulu Öndərin xeyir-duası ilə rəsmən qeyd olunaraq televiziyada yayımlanıb. Əlbəttə, ümumxalq bayramının dövlət səviyyəsində qeyd edilməsi Azərbaycan xalqının milli ruhunu yüksəldir, milli irsə, tarixə böyük məhəbbət yaradır. Ulu Öndər Heydər Əliyevdən sonra cənab Prezident İlham Əliyev də Novruz bayramına xüsusi dəyər verərərək yüksək səviyyədə qeyd edilməsi istiqamtində öz tapşırıqlarını verir.

Ən önəmlisi isə odur ki, Novruz bayramı artıq UNESCO tərəfindən beynəlxalq səviyyədə də qeyd olunur. Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın zəhməti və səyləri nəticəsində Novruz bayramı UNESCO-nun Qeyri-Maddi Mədəni İrs Siyahısına daxil edilib. Bununla yanaşı, 2010-cu ilin fevral ayının 23-də BMT Baş Məclisi 21 mart tarixini Beynəlxalq Novruz Günü elan edib. BMT Baş Məclisinin verdiyi bu qərar xüsusi əhəmiyyətə malikdir. Çünki bu, həm də türk coğrafiyasında yaşayan xalqların dünya sivilizasiyasına verdiyi mədəni töhfədir".

Deputat vurğulayıb ki, 44 günlük Vətən müharibəsində Ali Baş Komandan İlham Əliyevin rəhbərliyi ilə Azərbaycan ordusunun əldə etdiyi qələbədən sonra xalqımız bu bayramı yüksək əhval-ruhiyyə, ikiqat sevinc və böyük zəfər ruhu ilə qeyd edir:

"30 ildən sonra işğaldan azad olunan bölgələrdə, xüsusilə də Şuşada bayram tonqallarının qalanması, qalib ölkənin vətəndaşı kimi, məni də qürurlandırır. Bu möhtəşəm qürur hissini bizə yaşadan Ali Baş Komandana və Azərbaycanın mərd oğullarına təşəkkür edir, ərazi bütövlüyümüz uğrunda canlarından və sağlıqlarından düşünmədən keçən şəhidlərimizin qarşısında baş əyir, qazilərimizə Allahdan şəfa diləyirəm. Onların sayəsində iki ildir ki, bayramlarımızı qalib ölkənin vətəndaşı kimi qeyd edirik.

Novruz bayramı münasibəti ilə təbrik edir, sağlıqlı ömür və bol ruzi-bərəkət arzulayıram".

Aysel Yusifqızı

Telegramda izləyin