Hazırda qiymət artımı yolverilməzdir - MƏNTİQLİ ARQUMENT

Rusiya və Ukrayna müharibəsinin davam etməsi nəinki həmin ölkələrdə iqtisadiyyata mənfi təsir göstərib, həmçinin, qonşu dövlətlərə də nüfuz edib. Bəs bundan sui-istifadə edib süni bahalaşma edənlərin qarşısını necə almaq olar?

Mövzuyla bağlı Sonxeber-a iqtisadçı ekspert Turab Rzayev açıqlama verib.

O bildirib ki, şirkətlərin anbarlarında bir neçə aylıq məhsulun olduğu üçün bahalaşma yolverilməzdir:

"Taxıl məhsullarının artıq qiyməti artıb. Nə qədər ki, müharibə davam edəcək, bu mənfi təsir özünü göstərəcək. Rusiyadan, Ukraynadan gələn məhsullardan əlavə, maşın al-verində də problemlər olacaq.

Mallar Ukraynadan gələ bilmir, Rusiya bəzi məhsulların idxalına özü qadağa qoyub. Amma bütün bunlar belə, süni qiymət artımı etməyə icazə verməməlidir. Çünki indi satdıqları məhsulları ən azından bir neçə ay öncədən alıblar. Hazırda düşünürəm ki, onların anbarlarında bir neçə aylıq məhsullar var. O tarixədək də, ola bilsin, müharibə bitəcək və qiymət artımı olmadan davam edəcəyik.

Devalvasiya və müharibə olmayana, hər hansı enerji qiyməti artmayana, onun real effekti gəlib bura çatmayana qədər bəzən qiymətlərin süni artımı (hətta real effektdən bir neçə dəfə daha çox) olur. Bu, heç bir halda yolverilməzdir. Xüsusi əhalinin baza qida qiymətləri süni şəkildə qaldırıla bilməz".

Aysel SƏFƏRZADƏ

Telegramda izləyin