Azərbaycanlılara hansı köməkliklər göstəriləcək? - AÇIQLAMA - ÖZƏL

Təəssüflər olsun ki, Rusiya və Ukrayna müharibəsi hələ də davam edir. Bununla bağlı ölkə vətəndaşları yaşadıqları yeri tərk etmək məcburiyyətində qalıblar. Lakin ölkədən çıxmaq artıq daha da çətinləşib. Bəs Ukraynadan, Rusiyadan Azərbaycana sığınan yerlilərimizə hansı köməkliklər göstəriləcək?

Mövzu ilə bağlı Sonxeber.az-a Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Aydın Hüseynov açıqlama verib.

O bildirib ki, Baş nazir də parlamentdə hökumət hesabatında bununla bağlı çıxış edib:

"Bizim həm Ukraynada, həm Rusiyada olan vətəndaşlarımızın müharibə ilə əlaqədar olaraq ölkəyə qayıtmaları üçün işlər görülür. Lakin onların quru yolu ilə gəlməsi çox çətindir. Çünki pandemiya qaydalarına hər bir ölkə riayət edir. Ancaq təyyarə ilə gələ bilərlər. Rusiyadan gələnlər Dağıstandan keçirlər. Onların hava yolu ilə gətirilməsi üçün hökumət konkret tədbirlər görür. Ukrayna ilə bağlı isə bizim Moldaviyada, Ruminiyada, Bolqarıstanda olan səfirliklərimizin, konsulluqlarımızın hər birinin nömrələri mətbuatda, internet səhifələrində verilir ki, ora müraciət etsinlər. Həmin qurumlar vətəndaşlarımızın ölkəyə qayıtması üçün əllərindən gələn köməklikləri edirlər.

Rusiya və yaxud Ukrayna vətəndaşı olan Azərbaycan əsillilər də bu Vətənin insanlarıdır. Azərbaycan onların Vətənidir, Vətənə gələndə onlar üçün də dövlətin imkan çərçivəsində atacağı addımlar var. Hökumətin konkret tədbirlər planı var, onlara qarşı biganə qalınmır. Bütün bu proseslər nəzarətdədir, ölkə başçısının göstərişi ilə maksimal şəkildə tədbirlərin görülməsi üçün müvafiq tapşırıqlar verilib".

Aysel SƏFƏRZADƏ

Telegramda izləyin