Qocalmaq qorxusu, yoxsa gözəl görünmək ? - ÖZƏL

Dolğu maddələri qırışların müalicəsində, üzdə həcm artımına ehtiyac olan yerlərdə, çökəkliklərin müalicəsində istifadə edilən, bədənə uyumlu, sintetik olaraq hazırlanan maddələrdir.

Ölkəmizdə də dolğu üçün müraciət edənlərin sayı artmaqdadır.

Sonxeber.az-ın sorğusunu cavablandıran kosmetoloq Nərgiz İsmayılova bildirib ki, dolğunun müsbət cəhətlərindən biri yaş məhdudiyyətinin olmamasıdır.

"Dolğu üçün istənilən yaşda olanlar müraciət edirlər. Məsələn, gözaltı işıq dolğusunu hətta 16-17 yaşında olanlara da edirik. 22-25 yaşlarında olanlara, əgər dodaqlarının həcmi kiçikdirsə, dodaq dolğusu edilir".

Bəs yaşlı insanlar dolğunu nə üçün etdirirlər? Qocalıqla barışmamaq, daha gənc görünmək, komplekslərdən azad olmaq üçün yoxsa...?

Kosmetoloq bildirir ki, illər keçdikcə insanın üz quruluşunda müəyyən dəyişikliklər baş verir:

"Yaşla bağlı həm sümüklər kiçikləşir, həm də əzələlər atrofiyaya uğrayır. İnsan güzgüyə baxır və görür ki, üzündə, göz yaşı çuxurunda, çökəkliklər əmələ gəlib, dodaqların həcmi kiçilib, gicgah nahiyəsində həcmi dəyişib. Ona görə də, 45 yaşından yuxarı xanımlar özünü gənc görmək istəyirsə, əvvəlki görünüşünü geri qaytarmaq isəyirsə, o zaman yalnız dolğular deyil, kompleks müalicələr edilir.

Bəzən elə gənc xanımlar olur ki, onlar həddindən artıq kompleks yaşayırlar. Amma elə yaşlı xanımlar da olur ki, onlar dolğu və ya müxtəlif prosedurları komplekslə bağlı deyil, gözəl, baxımlı görünməkləri üçün edirlər.

Əgər 60 yaşlı bir xanım öz 30 yaşındakı şəklini gətirib yenidən həmin şəkildəki kimi olmaq istəyirsə, təbii ki, ilk növbədə pasiyentlə danışıb onu başa salırıq ki, hər yaşın öz gözəlliyi var. Maraqlanırıq ki, gənc görünmək istəyirlər, yoxsa gözəl? Buna cavab olaraq da müəyyən prosedurlar tətbiq olunur".

Aygün Osmanlı

Telegramda izləyin