"Azərsu" əməkdaşlarının döyülməsinin səbəbi nədir? - AÇIQLAMA

İçməli sudan səmərəli istifadə, su israfçılığın qarşısının alınması və xidmət haqlarının ödənilməsi ilə bağlı "Azərsu" Açıq Səhmdar Cəmiyyəti tərəfindən aparılan maarifləndirmə və təbliğat işlərinə baxmayaraq, bəzi abonentlər sudan səmərəli istifadə qaydalarına əməl etmirlər. Bu azmış kimi, "Azərsu"nun əməkdaşlarına da xəsarət yetirirlər.

Mövzu ilə bağlı Sonxeber.az-a "Azərsu" ASC-nin Mətbuat xidməti və ictimaiyyətlə əlaqələr şöbəsinin rəhbəri Anar Cəbrayıllı açıqlama verib.

O bildirib ki, "Azərsu"nun əməkdaşları sadəcə vəzifə öhtəliklərini yerinə yetiriblər:

"Abonentlərə dəfələrlə xəbərdarlıq edilib, ödəniş olunmadıqda isə suyu kəsmək istəyən əməkdaşlara qarşı şiddət tətbiq olunub. Sonuncu hadisə isə su israfçılığı ilə bağlıdır. Əməkdaşlarımız çəndən suyun nəzarətsiz dolub daşdığını görüblər. Bu zaman ev sahibinə xəbərdarlıq edilib ki, həmin ünvanda sayğac olsa da, belə su axa bilməz, çünki bu zaman ödənişini həyata keçirmək çətin olar. Ona görə əməkdaşlarımız sayğaca baxış keçirmək istəyiblər.

Bütün hallarda hadisə əməkdaşlarımız öz vəzifə öhdəliklərini yerinə yetirərkən baş verib".

Aysel Quliyeva

Telegramda izləyin